Ուշ երեկոյան Բրեստում ավարտվել է ռուս-ուկրաինական բանակցությունների երկրորդ փուլը: Ուկրաինայի նախագահ Վլադիմիր Զելենսկիի գրասենյակի ղեկավար Միխայիլ Պոդոլյակը տեղեկացրել է, որ բանակցությունների երկրորդ փուլի արդյունքում կողմերը մոտ ժամանակներս հումանիտար միջանցքների կազմակերպման համար կապի եւ փոխգործակցության ուղիներ ստեղծելու վերաբերյալ պայմանավորվածություն են ձեռք բերել։
Պոդոլյակը նշել է, որ ցավոք, ուկրաինական կողմը չունեցավ այնպիսի արդյունքներ, ինչպիսիք ակնկալում էր։ Ըստ նրա՝ բավականին մանրամասնորեն քննարկվել է մարդասիրական կողմը, քանի որ այսօր Ուկրաինայի բավականին շատ քաղաքներ շրջափակման մեջ են, դրանցում ստեղծվել է դրամատիկ իրավիճակ՝ կապված սննդի, դեղերի եւ տարհանման հնարավորությունների հետ։
Զելենսկու գրասենյակի ղեկավարը հավելել է, որ կողմերը պայմանավորվել են շարունակել աշխատանքներն արդեն բանակցությունների երրորդ փուլում՝ սեղմ ժամկետում։
Պոդոլյակն ամբողջությամբ ընթերցել է ռուս-ուկրաինական հանդիպման արդյունքում ընդունված հայտարարությունը։
«Կողմերը փոխըմբռնման են հասել քաղաքացիական խաղաղ բնակչության տարհանման համար մարդասիրական միջանցքների համատեղ ապահովման, ինչպես նաեւ առավել թեժ մարտերի վայրերում դեղորայքի եւ սննդամթերքի ապահովման հարցերի վերաբերալ՝ ժամանակավոր հրադադարի հնարավորությամբ այն ժամանակահատվածում, երբ տարհանում է իրականացվելու»,- նշված է տեքստում։
Ուկրաինայի արտգործնախարար Դմիտրի Կուլեբան մարտի 3-ին ավելի վաղ հայտարարել է, որ Ուկրաինան չի զիջելու իր համար սկզբունքային հարցերում, ինչպիսին է Ուկրաինայի տարածքային ամբողջականությունը:
«Դա բացառվում է: Ուկրաինան Ռուսաստանի Դաշնության հետ բանակցություններում աշխատելու է հումանիտար միջանցքների ստեղծման ուղղությամբ»,- ասել է Ուկրաինայի արտգործնախարարը։
Կուլեբան նշել է, որ իրենք միանշանակ կողմնակից են հրադադարի կնքմանը եւ իրավիճակը վերադարձնելու նախնական կետին մինչ ռազմական գործողությունների սկսվելը: