«Խոսրովի անտառ» պետական արգելոց տանող ճանապարհի աջ հատվածում` «Արփա-Սեւան» ամբարտակի հարեւանությամբ անցնող ջրատար առվում, սատկած բեզոարյան այծ է հայտնաբերվել։ Կենդանուն նկատել եւ ոստիկանություն է ահազանգել Արարատի մարզի բնակիչ Մանուկ Մ.-ն։
Ըստ shamshyan.com-ի՝ 33-ամյա Մանուկ Մ.-ն աշխատում է «Վայրի բնության եւ մշակութային արժեքների պահպանման» հիմնադրամում:
Ոստիկանության Արարատի բաժնում նյութեր են նախապատրաստվում որսագողության փաստով:
Բեզոարյան այծերը գրանցված են Հայաստանի Կարմիր գրքում։ ՀՀ-ում հանդիպում է բեզոարյան այծի կովկասյան ենթատեսակը։
Թարմացում.
ՀՀ շրջակա միջավայրի նախարարությունից հայտնել են, որ լրատվամիջոցներում հայտնված «Որսագողություն Խոսրովի անտառում. ջրատար առվի մեջ հայտնաբերվել է Կարմիր գրքում գրանցված, վնասվածքներով սատկած բեզոարյան այծ» գրառման հետքերով ոստիկանության Արարատի բաժնի հետաքննական բաժնի աշխատակիցները, իրացնելով օպերատիվ տեղեկությունը, անմիջապես մեկնել են դեպքի վայր։
ՀՀ կենդանիների Կարմիր գրքում գրանցված բեզոարյան այծը հայտնաբերվել է Վեդու ջրամբարի ճանապարհին՝ Ուրցաձոր համայնքի վարչական տարածքում: Նշանակվել է փորձաքննություն:
Նախարարությունից զգուշացրել են, որ բնապահպանական իրավախախտումների հետեւանքով կենդանական եւ բուսական աշխարհին պատճառված վնասի հատուցման սակագների մասին ՀՀ օրենքով բեզոարյան այծի որսի եւ (կամ) ոչնչացման դեպքում յուրաքանչյուր միավորի (անկախ տարիքից) համար կենդանական աշխարհին պատճառված վնասի հատուցման սակագինը կազմում է 3 միլիոն ՀՀ դրամ։ Հատուկ պահպանվող տարածքներում՝ հնգապատիկ ավելի։
Եթե իրավախախտմամբ պատճառվել է խոշոր վնաս, իրավախախտը ենթակա է քրեական պատասխանատվության համապատասխան օրենսգրքի 294-րդ հոդվածի 1-ին մասի 4-րդ կետով, այն է՝ պատժվում է տուգանքով` նվազագույն աշխատավարձի չորսհարյուրապատիկից վեցհարյուրապատիկի չափով կամ կալանքով` 4-6 ամիս ժամկետով։