Աշխարհահռչակ ռոք երաժիշտ, System of a Down խմբի մենակատար Սերժ Թանկյանը միլիոնից ավելի հետեւորդներ ունեցող իր ինստագրամյան էջում տեղադրած տեսաուղերձում կոչ է արել միանալու իրեն Երեւանում սեպտեմբերին 5-10-ին անցկացվելիք Starmus VI գիտության եւ արվեստի փառատոնին:
Թանկյանը հիշեցրել է, որ փառատոնին լինելու են երաժշտություն, գիտական կոնֆերանսներ, դասախոսություններ, սիմպոզիումներ եւ այլն: Սեպտեմբերին Հայաստան են ժամանելու աշխարհահռչակ տիեզերագնացներ Չառլզ Բոլդենը, Քրիս Հադֆիլդը, Ջիմ Բագյանը, Ջորջ Նիլդը, Չառլի Դյուկը:
Starmus VI գիտության եւ արվեստի փառատոնին մասնակցելու համար Հայաստան կժամանեն նաեւ նոբելյան մրցանակակիրներ Էդվարդ Մոուզերը, Քիփ Թորնը, Էմմանուել Շարպենտիեն, գիտնականներ Թոնի Ֆադելը, Բրայան Գրինը, Դոննա Սթրիքլենդը, ինչպես նաեւ Sons of Apollo խումբը, Ռիք Վեյքմանը, Սերժ Թանկյանը, Տիգրան Համասյանը, Անդրեյ Մակարեւիչը, Դերեկ Շերինյանը, միջազգային ճանաչում ունեցող մի շարք այլ արտիստներ ու գիտնականներ: