Եվրոպական հանձնաժողովը, Ուկրաինայի կառավարությունն ու Համաշխարհային բանկը Ուկրաինայի հետպատերազմական վերականգնումը գնահատել են 349 միլիարդ դոլար։ Սպասվում է, որ այս թիվը առաջիկա ամիսներին կաճի, քանի որ պատերազմը շարունակվում է։
Ուկրաինայի վնասի եւ կարիքների արագ գնահատումը (RDNA) ռուս-ուկրաինական պատերազմի հետեւանքով Ուկրաինայի՝ տվյալ պահի դրությամբ կրած վնասների առաջին համապարփակ գնահատումն է քսան տարբեր հատվածներում։ Փաստաթղթում շարադրված են նաեւ ֆինանսավորման այն կարիքները, որոնք ունենալու է Ուկրաինան կայուն, ներառական վերականգնման համար։ Ներկայացված է նաեւ վերականգնման պլանավորման ճանապարհային քարտեզը։
ԵՀ նախագահ Ուրսուլա ֆոն դեր Լայենը նշել է, որ պատերազմի հենց սկզբից ԵՄ-ն ի վիճակի է եղել կենտրոնացնելու 10 միլիարդ եվրո եւ հատկացնելու Ուկրաինային առաջնահերթ հումանիտար, արտակարգ ու ռազմական օգնության համար։ Եվս հինգ միլիարդ դոլարի ֆինանսավորում էլ այժմ ընթացքի մեջ է։
Ըստ Ուկրաինայի վարչապետ Դենիս Շմիգալի՝ Ուկրաինայի արագ վերականգնման առաջին փուլի համար միայն անհրաժեշտ կլինի 17 միլիարդ դոլար, որից 3,4 միլիարդն այս տարվա ընթացքում Կիեւն արդեն ստացել է։
Հայտարարությունում նշվում է, որ փետրվարի 24-ից հունիսի 1-ը պատերազմի պատճառով Ուկրաինային հասցված ֆինանսական վնասը 97 միլիարդ դոլար է։
Ավերածությունները հատկապես զգալի են բնակելի հատվածում, տրանսպորտային, առեւտրի եւ արդյունաբերության ոլորտներում։ Ավերածություններ հիմնականում Չեռնիգովի, Դոնեցկի, Լուգանսկի, Խարկովի, Զապորոժիեի եւ Կիեւի մարզերում են։
Ի դեպ, Ուկրաինայի վերականգնման համար անհրաժեշտ նշված 349 միլիարդ դոլարը 1,5 անգամ գերազանցում է Ուկրաինայի՝ 2021-ի Համախառն ներքին արդյունքը (ՀՆԱ)։ Հաջորդ 36 ամիսներին անհետաձգելի կարիքների բավարարման համար անհրաժեշտ կլինի 105 միլիարդ դոլար:
Անհետաձգելի կարիքներն են կրթական եւ առողջապահական ենթակառուցվածքների ու կենսական կարեւորություն ունեցող տրանսպորտային ուղիների վերականգնումը, ջեռուցման եւ էներգետիկ ենթակառուցվածքների վերականգնման միջոցով նախապատրաստությունն առաջիկա ձմեռվան, գյուղատնտեսության աջակցությունը այլն։
Զեկույցում նաեւ ասվում է, որ կարեւոր խնդիր են աղբի ու պատերազմից հետո մնացած պայթուցիկ ու ռազմական նշանակության նյութերի հետ տարվող աշխատանքը եւ վնասազերծումը։
Պատրաստեց Արման Գրիգորյանը