Ն.Ս.Օ.Տ.Տ. Գարեգին երկրորդ ծայրագույն պատրիարք եւ ամենայն հայոց կաթողիկոսը Հայկական բարեգործական ընդհանուր միության (ՀԲԸՄ) 92-րդ համագումարի պաշտոնական մասի բացման արարողության ժամանակ հայտարարել է, որ բաղձալի խաղաղության հաստատման շուրջ գործընթացները ներկայացվող պարտադրանքներով լուրջ տարակուսանքներ են հարուցում ՀՀ տարածքային ամբողջականության, Արցախի կարգավիճակի եւ տարածաշրջանում երկարատեւ կայունության հաստատման առնչությամբ։ Կաթողիկոսը նշել է, որ ՀԲԸՄ-ի տարեկան այս համագումարը տեղի է ունենում Հայաստանի եւ Արցախի համար դժվարին ժամանակաշրջանում, երբ հայ ժողովուրդը կանգնած է նոր կորուստների վտանգների առջեւ։
«44-օրյա պատերազմի, ինչպես նաեւ Հայաստանի դեմ Ադրբեջանի սանձազերծած ռազմական գործողությունների արհավիրքները հաղթահարելու համար այսօր Հայաստան ու Արցախ մեր հայրենիքը կարիքն ունի ոչ միայն աշխարհասփյուռ մեր ժողովրդի համախմբման, այլեւ բարեկամ պետությունների շարունակական սատարումի»,– շեշտել է կաթողիկոսը։
Ըստ վեհափառի` ներքին եւ արտաքին մարտահրավերների դիմագրավման համար անհրաժեշտ եւ հրատապ է աշխարհասփյուռ մեր ժողովրդի միաբանությունը, հայրենիք-սփյուռք հարաբերությունների վերաիմաստավորումն ու զորացումը, ազգային մեր ամբողջ ներուժի նպատակային մեկտեղումը։