Գերմանական Deutsche Welle պարբերականի ռուսական ծառայությունից հայտնել են, որ ՌԴ-ում փետրվարի 1-ին ուժի մեջ է մտել ռուսական նավթամթերքի գների վերին շեմ սահմանած «ոչ բարեկամ» երկրներին նավթի մատակարարումների արգելքը։ Ըստ ՌԴ նախագահ Վլադիմիր Պուտինի դեկտեմբերի 27-ի ստորագրած հրամանագրի՝ արգելվում են ռուսական նավթի եւ նավթամթերքի մատակարարումներն օտարերկրյա քաղաքացիներին եւ ընկերություններին, եթե պայմանագրերում ուղղակիորեն կամ անուղղակիորեն նախատեսվում է գնի վերին շեմի սահմանման մեխանիզմի կիրառում։ Սահմանափակված արժեքով նավթի արտահանումը թույլատրվում է միայն ՌԴ նախագահի թույլտվությամբ։ Արգելքը կգործի փետրվարի 1-ից մինչեւ հուլիսի 1-ը։
ՌԴ-ի նկատմամբ սահմանված պատժամիջոցների 8-րդ փաթեթի շրջանակում դեկտեմբերի 5-ից գործում է ծովով արտահանվող ռուսական նավթի գնի վերին շեմը՝ մեկ բարելի դիմաց 60 դոլարի մակարդակում: Արեւմուտքի երկրները նավթի գնի վերին շեմ են սահմանել, որպեսզի դժվարացնեն Ուկրաինայի դեմ ՌԴ-ի ռազմական գործողությունների ֆինանսավորումը եւ միեւնույն ժամանակ նավթի մատակարարումների դադարեցում եւ դրա համաշխարհային գների թռիչք թույլ չտան:
Ըստ Deutsche Welle-ի՝ գների վերին շեմի սահմանումից հետո ռուսական նավթի շուկան դարձել է «խիստ անթափանց»։ Պաշտոնական տվյալներով՝ ՌԴ-ն ստիպված է նավթը վաճառել մեկ բարելի դիմաց 47 դոլարով, սակայն դրա իրական գինը, փորձագետների գնահատումներով, պետք է լինի 70-75 դոլար մեկ բարելի դիմաց:
Տեղեկանք
Գների վերին շեմը նշանակում է, որ «Մեծ յոթնյակի» երկրները եւ Եվրամիությունը ռուսական նավթամթերքին առնչվող ապահովագրական եւ ֆինանսական ծառայություններ կտրամադրեն միայն այն դեպքում, եթե դրանք գնվել են առավելագույն սահմանված գնով կամ դրանից ցածր գնով: