Պատերազմի ուսումնասիրման ինստիտուտում (ISW) կարծում են, որ Ռուսաստանն ամենայն հավանականությամբ կհատի ռուս-ուկրաինական սահմանն ու ռազմական արշավներ կսկսի ռուս-ուկրաինական սահմանի հյուսիսային հատվածում։
Ռազմական փորձագետները նման եզրակացության հանգել են՝ հիմք ընդունելով ՌԴ նախագահ Վլադիմիր Պուտինի խոսքերն առ այն, որ «հարկավոր է ռուսական տարածքի գնդակոծման հնարավորությունները վերացնել»։ ISW-ում կարծում են, որ այս կերպ պայմաններ են ստեղծում «անդրսահմանային արշավների սրացման համար։ Նպատակը ուկրաինական զորքերի՝ ծայրահեղ կարեւորության հարձակման ուղղություններից ուշադրության շեղումն է եւ ստիպումը ավելի լայն ճակատով տեղաբաշխվել»։
Ռուսական կողմը, ըստ ISW-ի մասնագետների, փորձում է ուկրաինական զինուժին «սեղմել հյուսիսարեւելյան սահմանային շրջաններում»։ Նման ռազմարշավների հավանականություն կա Բելգորոդի, Բրյանսկի եւ Կուրսկի մարզերի սահմանամերձ շրջաններից։
Հրապարակված զեկույցում նաեւ նշվում է, որ Ռուսաստանի նախագահը փորձում է առաջ մղել տեղեկատվական-քարոզչական այն թեզը, թե ռուս-ուկրաինական պատերազմը գոյաբանական սպառնալիք է։ Այդ կերպ նա ցանկանում է ապահովել շարքային ռուսաստանցիների աջակցությունն իշխանություններին։