Մայիսի 4-ին Մամուլի ազատության համաշխարհային օրվա կապակցությամբ Հայաստանի մեդիաոլորտի ներկայացուցիչների եւ շահագրգիռ կողմերի համար կազմակերպած ընդունելությունում ՀՀ-ում ԱՄՆ դեսպան Քրիստինա Քվինն ընդգծել է ազատ մամուլի կարեւորագույն դերակատարումը ժողովրդավարական հասարակությունում քաղաքացիներին իրազեկելու եւ կառավարության ու իշխանություն ունեցողների հաշվետվողականության ապահովման հարցերում։ «Մամուլը կարեւորագույն դեր է խաղում տեղեկությունների ու մտքերի բաց փոխանակմանը նպաստելու, մարդկանց մշտապես իրազեկ պահելու, իշխանություն ունեցողների հաշվետու լինելը ապահովելու հարցերում, որոնք ցանկացած ժողովրդավարական հասարակության համար կենսական նշանակություն ունեն»,- շեշտել է դեսպան Քվինը։ Դեսպանն անդրադարձել է նաեւ Հայաստանի մեդիաոլորտին Միացյալ Նահանգների կողմից ցուցաբերվող աջակցությանը, մասնավորապես ԱՄՆ Միջազգային զարգացման գործակալության (USAID) եւ Հանրային դիվանագիտության գրասենյակի ծրագրերի միջոցով։
USAID-ը 2023-ի մարտին «Մեդիա ծրագիր Հայաստանում» ծրագրի իրականացման համար 15 միլիոն ԱՄՆ դոլարի համաձայնագիր է ստորագրել ամերիկյան «Ինտերնյուս նեթվորք» կազմակերպության հետ, որն աշխատելու է մեդիաոլորտի զարգացման հարցերով զբաղվող տեղական ՀԿ-ների, մասնավորապես՝ «Մեդիա նախաձեռնությունների կենտրոնի» եւ «Երեւանի մամուլի ակումբի», ինչպես նաեւ «Զինք նեթվորք» միջազգային խմբի հետ։ Ծրագիրը միտված է Հայաստանի տեղեկատվական տիրույթի ամրապնդմանը՝ լրագրողական ստանդարտների եւ բովանդակության որակի բարելավման, մրցունակության եւ հասարակության համար հետաքրքրություն ներկայացնող ԶԼՄ-ների ֆինանսական կենսունակության խթանման եւ անկախ տեղեկատվական հոսքերի համար նպաստավոր միջավայրի ապահովման միջոցով։
ԱՄՆ դեսպանության Հանրային դիվանագիտության գրասենյակը հայտարարել է 2,3 միլիոն ԱՄՆ դոլար ներդրման մասին, որն ուղղվելու է լրագրողական փորձի փոխանակման ծրագրերի իրականացմանը եւ լրագրողական կրթության մագիստրոսական ծրագրի ձեւավորմանը Հայաստանում։ Առաջին բաղադրիչը հայ-ամերիկյան մասնագիտական փոխգործակցության նախագիծն է՝ նախատեսված պրոֆեսիոնալ լրագրողների համար։ Երկրորդը՝ հայ-ամերիկյան համալսարանական փոխգործակցության ծրագիր է, որի միջոցով լրագրության գերազանցության կենտրոն կձեւավորվի հայաստանյան բուհերից մեկում։