Գերմանիայի կանցլեր Օլաֆ Շոլցը Ռուսաստանի նախագահ Վլադիմիր Պուտինի հետ նոյեմբերի սկզբին կայացած հեռախոսազրույցն անվանել է «հիասթափեցնող» եւ միեւնույն ժամանակ պատրաստակամություն հայտնել հետագայում եւս բանակցություններ վարելու նրա հետ։
«Դա հիասթափեցնող էր, քանի որ նա պարզապես կրկնում էր իր բոլոր ձեւակերպումները»,- ասել է Շոլցը RTL-ին:
Գերմանիայի կանցլերը նաեւ կարծիք է հայտնել, որ զրույցն առաջին հերթին անհրաժեշտ էր Պուտինին հասկանալու համար։ Շոլցի խոսքերով՝ հեռախոսազրույցի կարեւորությունն այն էր նաեւ, որ Ռուսաստանի նախագահին է փոխանցել կարեւոր այն ուղերձները, որ Մոսկվան չի կարող հույս դնել Գերմանիայի կողմից Ուկրաինային ցուցաբերվող աջակցության թուլացման վրա, եւ որ անհրաժեշտ է ուկրաինական օկուպացված տարածքներից դուրս բերել ռուսական բանակը, ինչպես նաեւ հիմք ստեղծել խաղաղ կարգավորման համար։
«Դա անհրաժեշտ է, եւ ես նորից կանեմ դա։ Բայց պատրանքներ ստեղծելու կարիք չկա»,- հավելել է Գերմանիայի կանցլերը։
Հիշեցնենք՝ Շոլցի եւ Պուտինի հեռախոսազրույցը տեղի էր ունեցել նոյեմբերի 15-ին՝ 2022 թվականի դեկտեմբերի 2-ից հետո առաջին անգամ։ Կրեմլը հայտարարել էր, որ կայացել էր «մտքերի մանրամասն եւ անկեղծ փոխանակում Ուկրաինայում տիրող իրավիճակի վերաբերյալ»։ Գերմանական կողմն էլ հայտնել էր, որ կանցլերը Պուտինին կոչ է արել դադարեցնել ագրեսիան Ուկրաինայի դեմ եւ դուրս բերել զորքերը երկրի տարածքից։
Ուկրաինայի նախագահ Վլադիմիր Զելենսկին քննադատել էր զրույցը՝ ասելով, որ «նման կոչերը չեն ուժեղացնում Ուկրաինան, այլ ճանաչում են Պուտինին»։ Երկու շաբաթ անց Շոլցը (նաեւ երկուսուկես տարվա ընթացքում առաջին անգամ) չհայտարարված այցով ժամանեց Կիեւ։ Զելենսկու հետ հանդիպման ժամանակ նա հայտարարել էր, որ Գերմանիան «շարունակում է մնալ Ուկրաինայի ամենաուժեղ աջակիցը ամբողջ Եվրոպայում»։