Ադրբեջանական լրատվամիջոցները հայտնել են, որ Ադրբեջանում թուրքական բանակի ներկայացուցչություն է ստեղծվել: Բաքվում կազմավորված հրամանատարական հատուկ խումբը ներկայացնելու է Ադրբեջանում Թուրքիայի զինված ուժերը:
Ներկայացուցչության կազմում ընդգրկվել են չորս թուրք գեներալներ։ Խումբը կղեկավարի Թուրքիայի ցամաքային զորքերի օպերատիվ մասի ղեկավար, գեներալ-մայոր Բախտիյար Էրսայը։ Վերջինիս անունը հայտնվել էր ռուսական «Взгляд» պարբերականի հետաքննական նյութերում։ Պարբերականը, վկայակոչելով Ադրբեջանի ՊՆ իր աղբյուրները, գրել էր, որ 2020 թվականի աշնանը Էրսայի գլխավորած թուրք զինվորականների խումբն անմիջականորեն մասնակցել է Լեռնային Ղարաբաղի դեմ ռազմական գործողությունների կազմակերպմանը:
Թուրքական հրամանատարությունը ներկայացնելու են նաեւ գեներալ Աբդուլա Գաթիրչին եւ թուրք ռազմական կցորդ, գեներալ Զաքարիա Յալչինը, իսկ հրամանատարության շտաբը կգլխավորի գեներալ Էնդի Գյուները: