Ըստ ռուսական «Կոմերսանտ» թերթի՝ Իրանը կմիանա Շանհայի համագործակցության կազմակերպությանը (ՇՀԿ): ՇՀԿ-ում ընդգրկվելու ընթացակարգի մեկնարկի մասին կհայտարարվի Տաջիկստանի մայրաքաղաք Դուշանբեում՝ սեպտեմբերի 16-17-ի գագաթնաժողովում: Ներկայում կազմակերպության անդամներն են Ռուսաստանը, Հնդկաստանը, Ղազախստանը, Ղրղզստանը, Չինաստանը, Պակիստանը, Տաջիկստանը եւ Ուզբեկստանը:
Իրանում Ռուսաստանի դեսպան Լեւան Ճաղարյանը «ՌԻԱ Նովոստիին» ավելի վաղ հայտնել է, որ Մոսկվան պաշտպանում է ՇՀԿ-ին լիիրավ կերպով անդամակցելու՝ Թեհրանի հայտը, քանի որ Ռուսաստանը եւ Իրանը «մոտ են, իսկ մի շարք միջազգային ու տարածաշրջանային հարցերի շուրջ դիրքորոշումները համընկնում են»:
Շանհայի համագործակցության կազմակերպությունը մշտապես գործող միջկառավարական միջազգային կազմակերպություն է, որը հիմնվել է Ղազախստանի, Ղրղզստանի, Չինաստանի, Ռուսաստանի, Տաջիկստանի եւ Ուզբեկստանի ղեկավարների կողմից: ՇՀԿ-ի ստեղծման վերաբերյալ հռչակագիրը վեց պետությունների ղեկավարները ստորագրել են Շանհայում, 2001-ի հունիսի 15-ին: 2017-ի հունիսի 9-ին ՇՀԿ-ի անդամ պետությունները որոշում են ստորագրել Հնդկաստանին ու Պակիստանին կազմակերպության մեջ ընդունելու վերաբերյալ: Ներկայում ՇՀԿ-ի դիտորդ երկրներ են Աֆղանստանը, Բելառուսը, Իրանը եւ Մոնղոլիան, գործընկեր երկրներ՝ Ադրբեջանը, Հայաստանը, Կամբոջան, Նեպալը, Թուրքիան եւ Շրի Լանկան: