ՌԴ ԱԳՆ պաշտոնական ներկայացուցիչ Մարիա Զախարովան հայտարարել է, որ Մոսկվան մշակում է ռուսաստանցիների համար վիզային ռեժիմի՝ Կիեւի սահմանման արձագանքը, սակայն մտադիր չեն որոշում ընդունելիս հայելային գործել: Նա նշել է, որ առաջին հերթին հաշվի են առնելու Ռուսաստանի շահերն ու հումանիտար նկատառումները:
Ուկրաինայի իշխանությունները հուլիսի 1-ից արգելել են ռուսների` առանց վիզայի մուտքը երկիր։
Զախարովան նշել է, որ Կիեւը, չեղարկելով 2 երկրների քաղաքացիների`առանց վիզայի ուղեւորությունների մասին միջկառավարական համաձայնագիրը, գիտակցաբար նպատակ է հետապնդում առավելագույն վնաս հասցնելու Ուկրաինայի եւ ՌԴ-ի բնակիչների միջեւ շփումներին, խզելու բարեկամական եւ ընկերական կապերը:
«Չենք նախատեսում լրացուցիչ դժվարություններ ստեղծել հասարակ ուկրաինացիների համար, դրանց թվում՝ փախստականների, որոնք ուկրաինացի ազգայնականների հետապնդումներից Ռուսաստանում պաշտպանություն են փնտրում։ Չենք մոռանում նաեւ ընտանեկան եւ այլ կապերի մասին, որոնք միավորում են երկու երկրների ժողովուրդներին»,–ասված է ԱԳՆ հաղորդագրության մեջ:
ՌԴ փոխարտգործնախարար Անդրեյ Ռուդենկոն ավելի վաղ հայտնել էր, որ Ուկրաինայի քաղաքացիները կարող են շարունակել Ռուսաստան մուտք գործել առանց վիզայի մինչեւ 2023 թվականի հունվարի 1-ը, երբ կլրանա Ռուսաստանի եւ Ուկրաինայի միջեւ վիզային համաձայնագրի ժամկետը: