Գերմանացի չորս փաստաբան Բելառուսի նախագահ Ալեքսանդր Լուկաշենկոյի դեմ հայց են ներկայացրել դաշնային դատախազություն՝ մարդկության դեմ հանցագործություններ կատարելու մեղադրանքով։
Փաստաբանները Գերմանիայի Դաշնությանը կոչ են արել անկախ հետաքննություն անցկացնելու՝ օգտվելով օրենքի այն կետից, որը հնարավորություն է տալիս քրեական պատասխանատվության կանչելու այլ պետության տարածքում կատարված գործողությունների համար, եթե դրանք արգելված են միջազգային իրավունքով։
Դիմումը տրվել է խաղաղ հավաքների ժամանակ բռնության ու կտտանքների ենթարկված մի խումբ բելառուսցիների անունից։
Բելառուսում ընդդիմախոսների դեմ ճնշումները սաստկացել են անցած տարվա օգոստոսից՝ վիճահարույց նախագահական ընտրություններից հետո, երբ հազարավոր մարդիկ փողոց դուրս եկան վեց անգամ անընդմեջ նախագահ վերընտրված Ալեքսանդր Լուկաշենկոյի դեմ։
Արեւմտյան տասնյակ երկրների շարքում Գերմանիան չի ճանաչել ընտրություններում Լուկաշենկոյի հաղթանակը։