Մարդու իրավունքների եվրոպական դատարանում Հայաստանի կառավարության ներկայացուցչի գրասենյակը տեղեկացրել է, որ այս պահին Ստրասբուրգի դատարանում 188 հայ ռազմագերիների վերաբերյալ որոշում կա։
Ըստ «Ազատություն» ռադիոկայանի՝ ՄԻԵԴ-ում Հայաստանի կառավարության ներկայացուցչի գրասենյակի իրավաբան, փորձագետ Իգոր Միրզախանյանը նշել է, որ մարտի 10-ի դրությամբ Եվրադատարանը 249 գերիների հարցով զբաղվելու որոշում է ընդունել, բայց քանի որ նրանց մի մասը վերադարձել է Հայաստան, այժմ ՄԻԵԴ-ը զբաղվում է 188-ի հարցով։ Պաշտոնական Բաքուն, սակայն, միայն 72-ի մասին է հաստատել, որ պահվում են ադրբեջանական բանտերում:
«Մենք ունենք 188 անձի վերաբերյալ որոշում, բայց որպեսզի համարենք, որ այդ մարդիկ գերության մեջ են, պետք է դատարանում ունենանք ադրբեջանական կողմից պաշտոնական հաստատում: Մինչդեռ գիտեք, որ որոշումները կան, բայց Ադրբեջանի կողմից համագործակցություն ու դատարանին բավարար տեղեկության տրամադրում չկա, ու այդ առիթով ՄԻԵԴ-ը մարտի 9-ին վճռել է իր որոշումները չկատարելու խնդրով դիմել Եվրոպայի խորհրդի Նախարարների կոմիտե»,- ասել է Իգոր Միրզախանյանը:
Նա նշել է, որ մայիսի 21-ին նախատեսվում է Եվրոպայի խորհրդի որոշում ընդունող մարմնի՝ Նախարարների կոմիտեի տարեկան նիստը, որի օրակարգում հնարավոր է՝ ընդգրկվի Ադրբեջանի հարցի քննարկումը. «Չի բացառվում, որ օրակարգում ներառվի կամ ընդհանուր քննարկվի խնդիրը կամ մեր նախարարի կողմից բարձրաձայնվի, հստակ չեմ կարող ասել` ինչ ձևաչափով, բայց ամենայն հավանականությամբ հարցը կքննարկվի»: