Եվրասիա համագործակցություն հիմնադրամի ամենամյա լրագրողական մրցույթի շրջանակում Ալիք Մեդիա Հայաստանի «Սերենա Ալ Հաջ։ Կրոնն ընտրություն է» հոդվածի համար առաջին մրցանակի են արժանացել նյութի հեղինակներ Անի Նազարյանը եւ Աղաբեգ Սիմոնյանը։
ԵՀՀ-ն հուլիսի 6-ին կրոնական եւ ազգային փոքրամասնությունների մասին հանդուրժողականության թեմայի շուրջ լավագույն լրագրողական նյութի համար հանձնել է ինը մրցանակ, որոնցից երեքը՝ խրախուսական։ Այս տարի հանձնվել են երկուական առաջին, երկրորդ եւ երրորդ մրցանակներ։
Առաջին մրցանակի է արժանացել նաեւ Ժաննա Պողոսյանը «Հորս արեւ, ես հայերեն չեմ խոսում» կամ 22-ամյա իրաքցի Ալաայի առօրյան Երեւանում» հոդվածի համար։
«Մեզ պակասեց խելքը, դասերը չսովորելը». արցախցի երեխաների մտքերը» եւ «Իսկ սարերի ետեւում պատերազմ էր․․․» նյութերի համար երկրորդ մրցանակներ են ստացել Անահիտ Հարությունյանն ու Կուշանե Չոբանյանը։
Երրորդ մրցանակի են արժանացել Սոնա Մարտիրոսյանը «Այլազգի ու այլադավան բնիկ երեւանցիները․ բոշաներ» եւ Սեդա Ղուկասյանը «Բացելով փակ շղթան. Եզդի աղջիկները պայքարում են սովորելու իրավունքի համար» նյութերի համար։
Մրցանակներ են տրվել Հովիկ Մխիթարյանին «Վհուկների որս» նյութի համար, Վարդան Ջալոյանին՝ «Կրքեր Ստամբուլյան Կոնվենցիայի Շուրջը», «Խաղաղությունը եւ Քրիստոնեական Եկեղեցիները», «Եղբայր Եմք Մենք». Ֆրանցիսկոս Պապի Նոր Շրջաբերականը», «Աղվանից Եկեղեցին. Ո՞վ Կարող Է Հավակնել Նրա Ժառանգության» հոդվածների համար, Մարինա Սայանին՝ «Արփինե Ներսիսյան եւ Մաուրո Սորենտի. հայ-իտալացի զույգի սիրո պատմությունը», «Կռիվ ու սեր», «Մուհամեդ Քամալ-Անի Հակոբյան զույգի ծանոթության պատմությունը» տեսաշարի համար։
Միջոցառմանը ներկա են եղել եւ մրցանակները հանձնել են Հայաստանում Նիդերլանդների դեսպան Նիկո Սխերմերսը, Հայաստանի Մարդու իրավունքների պաշտպան Արման Թաթոյանը, միջազգային կազմակերպությունների ներկայացուցիչներ։
Եվրասիա համագործակցություն հիմնադրամի ամենամյա լրագրողական մրցույթն իրականացվում է 2015-ից: Մրցույթը նպատակ ունի խրախուսելու Հայաստանում հանդուրժողականության, խաղաղ համակեցության եւ բազմազանության վերաբերյալ հավասարակշռված եւ նրբանկատ լրագրողական լուսաբանումը, որը կնպաստի փոքրամասնություն կազմող համայնքների նկատմամբ հասարակության հանդուրժողական եւ հարգալից վերաբերմունքի ձեւավորմանը։