ՀՀ ՊՆ-ից հայտնել են, որ ՀՀ պաշտպանության նախարար Արշակ Կարապետյանն ընդունել է Արցախում Ռուսաստանի Դաշնության խաղաղապահ ուժերի նորանշանակ հրամանատար, գեներալ-մայոր Միխայիլ Կոսոբոկովին եւ Հայաստանի Հանրապետությունում ռուսաստանյան 102-րդ ռազմական բազայի հրամանատար, գնդապետ Դմիտրի Օվչարովին: Հանդիպմանը մասնակցել է նաեւ ՀՀ-ում ՌԴ դեսպանության պաշտպանական հարցերով կցորդ, գնդապետ Իգոր Շչերբակովը:
Գեներալ-մայոր Միխայիլ Կոսոբոկովին պաշտոնը ստանձնելու առթիվ շնորհավորելով՝ Արշակ Կարապետյանը հաջողություններ է մաղթել խաղաղապահ առաքելության ընթացքում:
Նախարարը ՌԴ 102-րդ ռազմական բազայի հրամանատարի պաշտոնում նշանակվելու առիթով շնորհավորել է նաեւ գնդապետ Դմիտրի Օվչարովին եւ կարեւորել Հայաստանի տարածքում տեղակայված ռուսաստանյան ստորաբաժանման դերն ու նշանակությունը:
Պաշտպանական գերատեսչության ղեկավարը բարձր է գնահատել Ռուսաստանի Դաշնության՝ տարածաշրջանում ռազմաքաղաքական իրավիճակի կայունացմանը, ինչպես նաեւ Արցախում իրականացվող ՌԴ խաղաղապահ առաքելության ընթացքն ու արդյունավետությանն ուղղված ջանքերը։
Հանդիպման ընթացքում կարծիքներ են փոխանակվել նաեւ տարածաշրջանային անվտանգության խնդիրների շուրջ:
Միխայիլ Կոսոբոկովը նախկինում զբաղեցրել է 58-րդ համազորային բանակի (Հարավային ռազմական օկրուգ) հրամանատարի տեղակալի պաշտոնը։ 2014-2017-ին նա եղել է Աբխազիայում ռուսական 7-րդ ռազմական բազայի հրամանատարը։
Նախորդ շաբաթ Արցախում ՌԴ խաղաղապահ ուժերի առաջին եւ արդեն նախկին հրամանատար Ռուստամ Մուրադովն ավարտեց խաղաղապահ առաքելությունը: