«Արմենիա» ավիաընկերության փոխտնօրեն, կոմերցիոն գծով տնօրեն Գեւորգ Խաչատրյանը հայտնել է, որ Հայկական ավիաընկերություններին իր օդային տարածքը տրամադրելու` Թուրքիայի մերժումը անդրադառնում է թռիչքների գնի եւ տեւողության վրա։
Նա հավելել է, որ գործունեության ամբողջ վեց տարվա ընթացքում ավիաընկերության ինքնաթիռները թռչում էին Թուրքիայի օդային տարածքով, իսկ թուրքական ինքնաթիռները` հայկական տարածքով: Մարտ-ապրիլին ավիաընկերությունը դիմել էր Թուրքիայի օդային տարածքով թռչելու թույլտվություն ստանալու համար եւ մերժում էր ստացել։
«Մենք այս պահին Թուրքիայի օդային տարածքով չենք թռչում, բայց բանակցություններն ընթանում են, ու կարծես թե դրական տեղաշարժ կա։ Հուսով ենք, որ կարճ ժամկետներում հարցը կկարգավորվի»,- ասաց փոխտնօրենը։
Գեւորգ Խաչատրյանը հայտնել է, որ «Արմենիա» ավիաընկերությունը 2020 թվականի մայիսից դեկտեմբեր ամիսներին, օդային սահմանների փակ լինելու պատճառով, իրականացրել է 536 էվակուացիոն չվերթներ, որոնցով շուրջ 38 հազար ՀՀ քաղաքացի է տարհանվել տարբեր երկրներից եւ տեղափոխվել Հայաստան։
Նա ընդգծել է, որ էվակուացիոն չվերթների հիմնական ուղղությունները եղել են ՌԴ քաղաքները՝ Մոսկվա, Վորոնեժ, Միներալնիե Վոդի, Կրասնոդար, Դոնի Ռոստով, Նովոսիբիրսկ, Սոչի, Եկատերինբուրգ, ինչպես նաեւ Ֆրանսիայի Լիոն, Արաբական Միացյալ Էմիրությունների Դուբայ քաղաքները։
Նշենք, որ Քաղավիացիայի կոմիտեի տվյալներով վերջին անգամ Թուրքիան իր երկնքով հայկական քաղաքացիական օդանավի թռիչքի թույլտվություն տվել է 2020-ի օգոստոսի 29-ին, ինչից հետո բոլոր հարցումները մերժել է:
Ի դեպ, որեւէ երկրի օդային տարածքի օգտագործումը վճարովի է (օդանավի աերոնավիգացիոն սպասարկման վճար ըստ անցած կիլոմետրերի), այլ կերպ ասած՝ որքան մեծ է օդանավերի հոսքը տվյալ պետության երկնքում, այնքան շահում է այդ պետությունը: