ՌԴ ԱԳՆ պաշտոնական ներկայացուցիչ Մարիա Զախարովան ամենշաբաթյա ճեպազրույցում հայտարարել է, որ Ռուսաստանն ուշի-ուշով հետեւում է Հայաստանում եւ Ադրբեջանում ընթացող խաղաղության պայմանագրի ստորագրման մասին քննարկումներին:
«Մենք ուշադիր հետեւում ենք Հայաստանում եւ Ադրբեջանում ընթացող քննարկումներին՝ երկու երկրների միջեւ խաղաղ պայմանագրի կնքման վերաբերյալ, Լեռնային Ղարաբաղի կարգավիճակի խնդրի լուծման հետ կապված»,- ասել է Զախարովան:
Նա նշել է, որ ցավոք, քաղաքական հարցերի վերաբերյալ հիմնարար տարաձայնությունները դեռեւս պահպանվում են: «Ուստի այս փուլում Մոսկվան կարեւորում է 2020-ի նոյեմբերի 9-ի եւ 2021-ի հունվարի 11-ի եռակողմ համաձայնագրերի բոլոր դրույթները խստորեն պահպանելը: ՌԴ-ն հույս ունի, որ այդ քայլերը կօգնեն հայ-ադրբեջանական հարաբերությունների կարգավորմանը հասնելու համար պայմաններ ստեղծելուն»,- ընդգծել է ՌԴ ԱԳՆ պաշտոնական ներկայացուցիչը։