Ըստ ռուսական ՏԱՍՍ գործակալության՝ Լեռնային Ղարաբաղում ռուսական խաղաղապահ ուժերի արդեն նախկին հրամանատար, գեներալ-լեյտենանտ Ռուստամ Մուրադովը դրական է գնահատել տարածաշրջանում ռուս խաղաղապահների աշխատանքը:
«Ես Ռուսաստանի Դաշնության խաղաղապահ առաքելության գործունեությունը գնահատում եմ միայն դրական: Մեզ գնահատում է նաեւ խաղաղ բնակչությունը։ Այսօր Ղարաբաղում կյանքը եռում է: Ամեն ինչ լավ է»,- ասել է Մուրադովը այսօր Մախաչկալայում «Հայրենիքի հերոսներ» համառուսաստանյան հայրենասիրական ակցիայի մասնակիցների հետ հանդիպմանը:
Նա հիշեցրել է, որ ռուս խաղաղապահները հակամարտությունից հետո հինգ տարի կմնան Լեռնային Ղարաբաղի տարածքում: «Առաջին հինգ տարիներից հետո որոշում կընդունվի ռուսական խաղաղապահ կոնտինգենտի մնալու եւ հետագա երկարաձգման վերաբերյալ»,- ասել է գեներալը:
Արցախում Ռուստամ Մուրադովի վերջին խաղաղապահ առաքելությունը սեպտեմբերի 7-ին Բաքվից երկու հայ գերիների վերադարձն էր: Որպես Լեռնային Ղարաբաղում ռուսական խաղաղապահ ուժերի հրամանատար Ռուստամ Մուրադովին փոխարինել է գեներալ-մայոր Միխայիլ Կոսոբոկովը։