«ԷկոԼուր» տեղեկատվական, «Համայնքային համախմբման եւ աջակցության կենտրոն» ՀԿ-ները պահանջում են չեղյալ համարել Կուրթանում նոյեմբերի 8-ին անցկացված հանրային լսումները: Այդ մասին նրանք հայտարարություն են տարածել՝ նշելով նաեւ վեց հիմնավոր պատճառ, թե ինչու Ձորագետի վրա նոր հիդրոէլեկտրակայան (ՀԷԿ) չի կարող լինել:
Առաջին՝ «Լոռիբերդ» ՓՀԷԿ-ը չի կարող կառուցվել Ձորագետ գետի վրա, քանի որ կառավարության որոշման համաձայն՝ Ձորագետը մեկն է այն 25 գետերից, որոնց վրա արգելվում է ՀԷԿ-ի կառուցումը: Հայտարարության հեղինակների կարծիքով շրջակա միջավայրի նախարարությունը պետք է հրաժարվի այս ՓՀԷԿ-ի ՇՄԱԳ հայտը փորձաքննելուց՝ հիմք ընդունելով վերոնշյալ, իր իսկ մշակած որոշումը:
Երկրորդ հիմնավորումը վերաբերում է կոնֆլիկտային իրավիճակին. լսումների ժամանակ ճնշումներ են գործադրվել ինչպես քաղհասարակության ներկայացուցիչների, այնպես էլ լրագրողների նկատմամբ: «Առկա ճնշումների պարագայում անհնար է պարզել Կուրթան գյուղի բնակչության կողմնորոշումը «Լոռիբերդ» ՀԷԿ-ի կառուցման կողմ կամ դեմ լինելու վերաբերյալ տվյալ լսման միջոցով»:
Երրորդ՝ Վարդաբլուր, Գյուլագարակ եւ Ամրակից գյուղերի բնակիչներն ահազանգում են, որ իրենց կարծիքը չեն հարցնում, մինչդեռ հնարավոր է իրենց ավելի մեծ չափի վնաս հասցվի: Հատկապես, որ այս գյուղերն արդեն իսկ բախվում են ջրային պակասուրդի հետ, որը տարեցտարի խորանում է կլիմայի փոփոխության պատճառով։ Ջրհոսքը շարունակաբար նվազում է:
Չորրորդ պատճառը վերաբերում է ազդակիր գյուղերում զարգացում ապրող տուրիստական գործունեության վրա հնարավոր բացասական ազդեցությանը, քանի որ զբոսաշրջությունն այստեղ հիմնված է յուրահատուկ լանդշաֆտների, բնակլիմայակայան բարենպաստ պայմանների եւ պատմամշակութային ժառանգության վրա:
Հինգերորդ՝ նախաձեռնող ընկերության ներկայացուցիչները, չնայած գյուղացիների պահանջին, չեն ներկայացրել ՀԷԿ-ի կառուցման եւ շահագործման ընթացքում շրջակա միջավայրի վրա հնարավոր վտանգները, ռիսկերն ու դրանք չեզոքացնելու մոտեցումները:
Եվ վեցերորդ՝ համայնքի բնակիչները բավարար չափով իրազեկված չեն հիդրոէներգետիկայի ոլորտի կարգավորման օրենսդրական պահանջների մասին:
«Հաշվի առնելով ՀՀ Կառավարության 2021 թվականի ապրիլի 8-ի 488-Ն որոշումը, բնակչության իրազեկվածության ցածր մակարդակն ու հանրային լսումների կոնֆլիկտային եւ ճնշող մթնոլորտը՝ կոչ ենք անում հրաժարվել «Լոռիբերդ» ՓՀԷԿ-ի կառուցման նախագծից եւ չեղյալ համարել Կուրթանում 2021-ի նոյեմբերի 8-ին անցկացված հանրային լսումները»,- նշված է հայտարարության մեջ:
Բնօգտագործման եւ բնապահպանության մասնագետ եմ։ Ունեմ նաեւ լրագրողի շուրջ 15-ամյա փորձ։ Զույգ մասնագիտություններս հաջողությամբ համատեղում եմ հասարակական գործունեության հետ՝ հանուն բնության եւ առողջ միջավայրի։