ԵԱՀԿ Մինսկի խմբի համանախագահները (Էնդրյու Շոֆեր (ԱՄՆ), Իգոր Խովաեւ (ՌԴ), Բրիս Ռոքֆոյ (Ֆրանսիա)) հանդես են եկել հայտարարությամբ
«Համանախագահները նոյեմբերի 10-ին Փարիզում առանձին հանդիպել են Ադրբեջանի արտգործնախարար Ջեյհուն Բայրամովի եւ Հայաստանի արտգործնախարար Արարատ Միրզոյանի հետ։ Համանախագահները երկու արտգործնախարարներին ընդունել են համատեղ հանդիպմանը, որը բացել է Ֆրանսիայի արտգործնախարար Ժան Իվ Լը Դրիանը։ Հանդիպումներին մասնակցել է նաեւ ԵԱՀԿ գործող նախագահի անձնական ներկայացուցիչ Անջեյ Կասպրշիկը։
Համանախագահները եւ արտգործնախարարները շարունակել են Նյու Յորքում սկսված քննարկումները մի շարք հնարավոր ապաէսկալացիոն միջոցների եւ գործընթացի հետագա քայլերի վերաբերյալ՝ ներառյալ այս ձեւաչափով ապագա հանդիպումները եւ համանախագահների առաջարկած այցը տարածաշրջան։ Համանախագահները եւ նախարարները քննարկել են նաեւ նոյեմբերի 9-ի եռակողմ հայտարարությամբ ստանձնած պարտավորությունների կատարման ընթացքը։
Խուսափելով բորբոքիչ հռետորաբանությունից եւ սադրիչ գործողություններից
Համանախագահները վերահաստատել են մարդասիրական հարցերում առաջընթացի հասնելու կարեւորությունը՝ ներառյալ կալանավորները, ականազերծումը, անհայտ կորածները, տեղահանվածների կամավոր վերադարձը եւ պատմական ու մշակութային վայրերի պաշտպանությունը, ինչպես նաեւ կողմերին կոչ են արել ապահովելու միջազգային մարդասիրական կազմակերպությունների հասանելիությունը։ Համանախագահները նաեւ ընդգծել են բորբոքիչ հռետորաբանությունից եւ սադրիչ գործողություններից խուսափելու կարեւորությունը:
Համանախագահները նոյեմբերի 10-ին եւ 11-ին հանդիպել են Ֆրանսիայի արտաքին գործերի նախարարության եւ Ելիսեյան պալատի ներկայացուցիչների հետ՝ քննարկելու իրենց մանդատի համաձայն շարունակական ջանքերի կարեւորությունը՝ օգնելու կողմերին համապարփակ լուծումներ գտնելու Լեռնային Ղարաբաղի հակամարտությանն առնչվող կամ դրանից բխող մյուս բոլոր հարցերի համար»։