Hürriyet օրաթերթը հայտնում է, որ Թուրքիայի զինված ուժերը օդային օպերացիայի միջոցով հարվածի տակ են առել Իրաքի եւ Սիրիայի հյուսիսում քրդական ուժերի կողմից որպես ռազմաբազա կիրառվող Դերիք, Սինջար եւ Քարաջաք բնակավայրերում գտնվող թաքստոցները։
Օպերացիայի ավարտից հետո Թուրքիայի ազգային պաշտպանության նախարարը հանդիպում է ունեցել օդուժի անձնակազմի հետ՝ նրանց շնորհավորելով Սիրիայի ու Իրաքի հյուսիսում տեղակայված քրդերի դեմ իրականացված «Ձմեռային արծիվ օպերացիայի» հաջող ավարտի առիթով, նշել է պարբերականը։
Նախարարն ասել է, որ որպես ահաբեկիչ փնտրվող քրդերի ցուցակի մի շարք ներկայացուցիչներ չեզոքացվել են։
«Մեր նպատակն է ապահովել Թուրքիայի 84 միլիոն քաղաքացիների անվտանգությունն ու մեր սահմանների ամբողջականությունը։ Այս նպատակին ուղղված օպերացիան մանրամասն մշակվել եւ իրականացվել է։ Ինչպես մեր բոլոր մյուս գործողություններում, այս անգամ եւս օպերացիան իրականացրել ենք խիստ ուշադիր, որպեսզի դրանց հետևանքով չտուժի եւ ոչ մի անմեղ քաղաքացի։ Թիրախավորվել են ահաբեկիչների թաքստոցները, քարանձավները, թունելներն ու դեպոները, ահաբեկիչների, այսպես կոչված, կրթական կենտրոններն ու հավաքատեղիները։ Ահաբեկչական կազմակերպության անկումն արդեն սկսված է։ Այս օպերացիայի մեկ այլ նպատակն էր ահաբեկիչներին ցույց տալ Թուրքիայի զինված ուժերի կարողություններն ու դրանով իսկ ստիպել նրանց ինքնակամ հանձնվել»,- իր խոսքում նշել է Թուրքիայի ազգային պաշտպանության նախարար Հուլուսի Աքարը։
Պատրաստեց Լիլիթ Մարտիրոսյանը