ԵԱՀԿ մամուլի ծառայությունից հայտնել են, որ մարտի 1-ին Խարկովում գնդակոծության ժամանակ զոհվել է Ուկրաինայում ԵԱՀԿ հատուկ մոնիթորինգային առաքելության տեղական աշխատակից Մարինա Ֆենինան։
ԵԱՀԿ գլխավոր քարտուղար Հելգա Շմիդտը եւ նախագահող երկրի արտգործնախարար լեհ Զբիգնեւ Ռաուն ցավակցություն են հայտնել զոհվածի հարազատներին:
«Մարինան սպանվել է, երբ փորձում էր իր ընտանիքի համար սնունդ ստանալ մի քաղաքում, որը մարտական գոտու է վերածվել։ Խարկովում եւ Ուկրաինայի այլ քաղաքներում ռեակտիվ զենքը, հրետանային արկերն ու հրթիռները հարվածներ են հասցնում քաղաքի բնակելի շենքերին ու կենտրոնին՝ սպանելով ու վնասելով անմեղ քաղաքացիական բնակչությանը»,- ասել է Շմիդտը:
Ավելի վաղ հայտնի էր դարձել, որ Խարկովում ԵԱՀԿ դիտարկման խումբը հետ է կանչվել Դնեպր եւ սպասում է երկրից դուրս գալուն: