Ուկրաինայում սկսված պատերազմի հետեւանքով շարունակում են բարձրանալ բենզինի ու մի շարք այլ ապրանքների գները։ Մարտի 2-ի դրությամբ ստեղծված աշխարհաքաղաքական լարվածության հետեւանքով ցորենի գինը կտրուկ աճել է ու հասել 2008 թվականից ի վեր ամենաբարձր արժեքին, հայտնում է թուրքական Sözcü օրաթերթը։
Հաշվի առնելով շուկայում մատակարարման հնարավոր խնդիրները՝ ԱՄՆ-ում ցորենի մատակարարման ֆորվարդային պայմանագրերում (նման պայմանագրերը կնքվում են նախապես ամրագրված արժեքով՝ ապագայում հնարավոր տատանումների հետեւանքով հավանական կորուստների ու ռիսկերի նվազեցման համար) անգամ շարունակում է աճել ցորենի գինը։
Մարտի 2-ին ցորենի մեկ տոննայի արժեքը 370 դոլար էր, իսկ մարտի 3-ին՝ արդեն 420 դոլար՝ գրանցելով օրական 12,5% աճ։ Իսկ մինչեւ Ռուսաստանի՝ Ուկրաինայի վրա հարձակումը ցորենի մեկ տոննայի արժեքը 320 դոլարի սահմաններում է եղել։
Գնաճի պատճառը պատերազմի հետեւանքով Ռուսաստանի ու Ուկրաինայի ցորենի մատակարարման հնարավոր խանգարումներն են, քանի որ այս երկու պետություններն ապահովում են ցորենի համաշխարհային պաշարների մատակարարման գրեթե մեկ երրորդը։
Միեւնույն խնդիրն առկա է նաեւ Թուրքիայում, որտեղ ցորենի երկու խոշորագույն մատակարարներն են հենց Ուկրաինան ու Ռուսաստանը։ Այս պետություններից ցորենի ներկրման դադարեցումը կբերի հիմնական սննդի միջոցների զգալի գնաճի, նշում է պարբերականը։
Թուրքիայի գյուղմթերքի գրասենյակի հայտարարած ցորենի ներկրման թենդերի առաջին փուլում մեկ տոննայի համար առաջարկվող ամենաբարձր գինը եղել է 420 դոլար, իսկ ամենացածրը՝ 341,9-351,8 դոլարի միջակայքում։ Համաձայն այս տվյալների՝ նախորդ թենդերի համաձայն ցորենի մեկ տոննայի արժեքում գրանցվել է 22% աճ։
Պատրաստեց Լիլիթ Մարտիրոսյանը