ՌԴ ԱԳՆ պաշտոնական ներկայացուցիչ Մարիա Զախարովան հայտարարել է, որ ՄԱԿ-ի Անվտանգության խորհրդից Ռուսաստանի հնարավոր հեռացման մասին հայտարարություններն աբսուրդ են։
Մեծ Բրիտանիայի վարչապետ Բորիս Ջոնսոնն ավելի վաղ առաջարկել է դիտարկել նաեւ ՄԱԿ-ի Անվտանգության խորհրդից Ռուսաստանին հեռացնելու հարցը։
ՄԱԿ-ի Անվտանգության խորհրդի մշտական անդամ Ռուսաստանը որոշումներ է ընդունում անվտանգային հարցերի եւ խաղաղապահ առաքելությունների վերաբերյալ: Իբրեւ մշտական անդամ՝ Ռուսաստանն իրավունք ունի վետո դնելու Անվտանգության խորհրդի բանաձեւերի վրա։
Մեծ Բրիտանիայի արտգործնախարար Լիզ Թրասն Ուկրաինայում ռազմական գործողության պատճառով Ռուսաստանի իշխանություններին նախօրեին մեղադրել էր միջազգային իրավունքի խախտման համար եւ կոչ էր արել ՌԴ-ին միջազգային ասպարեզում մեկուսացնելու:
«Եթե սկսենք մեկնաբանել ամեն մի խենթ հայտարարություն, ստիպված կլինենք զբաղվել միայն դրանով։ Արեւմուտքը շարունակելու է անել անհեթեթ հայտարարություններ եւ փորձելու է վախեցնել»,- նշել է Զախարովան եւ հավելել, որ Արեւմուտքում վաղուց հրաժարվել են իրավական ուղուն հետեւելուց, եւ արեւմտյան պետական այրերի քայլերի հիմքում իրավունքն ընկած չէ։
ՌԴ ԱԳՆ պաշտոնական ներկայացուցիչը նշել է, որ այս փուլում պատժամիջոցների տեւողության վերաբերյալ կանխատեսումներ անելը բարդ է՝ միաժամանակ համոզմունք հայտնելով, որ պատժամիջոցների պայմաններում կբացվեն նոր ներքին հնարավորություններ, որոնցից պետք է օգտվել:
Զախարովան ընդգծել է, որ ռուսական գործարար շրջանակները չպետք է ընկճվեն, քանի որ ՌԴ-ում սթրեսային սցենարը մշակվել է դեռեւս համավարակի ընթացքում: