Թուրքիայի «Ազգայնական շարժում» կուսակցության ղեկավար Դեւլեթ Բահչելին կուսակցության նիստի ժամանակ խոսել է փետրվարի 24-ին Ռուսաստանի՝ Ուկրաինայի վրա հարձակման շուրջ՝ որակելով Ռուսաստանի գործողությունները «անարդար, անօրինական ու անընդունելի»․ «Սա մեծ հարված է միջազգային իրավունքի նորմերին, Մինսկի գործընթացին եւ Ուկրաինայի տարածքային ամբողջականությանը։ Ուկրաինայի վրա հարձակումը Սառը պատերազմից հետո ամենալուրջ ճգնաժամն է»,- Habertürk պարբերականի հաղորդմամբ իր խոսքում նշել է Բահչելին։
«Հարձակումն արդեն 8-րդ օրն է շարունակվում։ Բայց ՄԱԿ-ը ոչինչ չի կարողանում անել՝ բացի ռազմական գործողությունները անօրինական որակող հայտարարությունների տարածումից։ Արյունահեղությունը շարունակվում է, իսկ աշխարհը ամոթալիորեն մնում է անհաղորդ ու տնտեսական պատժամիջոցներով է զբաղված»։
«Ուկրաինայի ճգնաժամի մի կողմում Ռուսաստանի բռնակալությունն է, իսկ մյուս կողմում՝ ՆԱՏՕ-ի ու Արեւմուտքի սադրանքները։ Երեկ արյունոտ օրակարգի առաջին շարքերում էին Բոսնիան, Բաղդադը, Քաբիլը, Կոսովոն, Սանաան, Դամասկոսը, իսկ այսօր Կիեւն է»։
«Մեր կարծիքով, հակամարտության լուծմանը տանող անհրաժեշտ քայլերը հետեւյալն են․ հարգել Ուկրաինայի քաղաքական ու տարածքային ամբողջականությունը, հասնել Ուկրաինայի ու Ռուսաստանի միջեւ զինադադարի հաստատմանը։ Ռուսաստանը պետք է հրաժարվի գրավելու մտքից ու հետ քաշի իր զորքերը Ուկրաինայից։ ՆԱՏՕ-ն պետք է վերանայի դեպի արեւելք իր ընլայնման ծրագիրը։ Միակ լուծումը դիվանագիտությունն ու երկխոսությունն են»։
«Թուրքիան միակ պետությունն է, որ կարող է Ռուսաստանի ու Ուկրաինայի հետ նստել բանակցությունների սեղանի շուրջը։ Մեր կարծիքով, խաղաղության տանող միակ ճանապարհն ու գրավականը մեր հարգարժան նախագահ Էրդողանի ակտիվ միջնորդությունն է՝ իր բազմակողմանի քաղաքական, տնտեսական ու առեւտրական կապերի օգտագործմամբ։ Մենք հավատում ենք, որ Ստամբուլում հնարավոր բանակցությունների արդյունքում կգտնվեն ճգնաժամից ելքի ուղիները»,- ասել է Դեւլեթ Բահչելին։
Պատրաստեց Լիլիթ Մարտիրոսյանը