Գերմանիայի կանցլեր Օլաֆ Շոլցը հայտարարել է, որ Ռուսաստանի դեմ պատժամիջոցները կարող են չեղարկվել միայն ուկրաինական կողմի հետ այդ հարցը քննարկելուց հետո։ Ըստ կանցլերի՝ Մոսկվան ստիպված կլինի համաձայնության գալ Ուկրաինայի հետ։
Գերմանիայի կառավարության ղեկավարը, միեւնույն ժամանակ, համոզմունք է հայտնել, որ Մոսկվայի եւ Կիեւի միջեւ խաղաղության հնարավոր համաձայնագրի ստորագրում մոտ ապագայում չի սպասվում։
«Մենք այժմ վտանգավոր իրավիճակում ենք։ Բոլորն աջակցում են Ուկրաինային եւ միեւնույն ժամանակ չեն ցանկանում ՆԱՏՕ-ի եւ Ռուսաստանի միջեւ ուղիղ առճակատում թույլ տալ»,- նշել է կանցլերը։
Շոլցը վստահեցրել է՝ Բեռլինը կանի հնարավորը միջուկային պատերազմից խուսափելու համար։ «Այս դիրքորոշումը կիսում են բացարձակապես բոլորը՝ ՆԱՏՕ-ում եւ ԵՄ-ում»,- ընդգծել է կանցլերը։
Բանակցություններում դրական դինամիկա չկա
Պետդումայի պատգամավոր, Ուկրաինայի հետ բանակցություններում ռուսական պատվիրակության անդամ Լեոնիդ Սլուցկին վիրավորում ստացած զինծառայողների հետ հանդիպման ժամանակ հայտարարել է, որ ռուս-ուկրաինական բանակցությունները բարդ են ընթանում:
«Մենք փորձում ենք անել հնարավորը ոչ միայն հատուկ ռազմական գործողության առաջխաղացման առումով։ Մեր ուկրաինացի գործընկերների հետ համաձայնության ենք գալիս, նրանք այնուհետեւ հետքայլ են անում»,- նշել է նա։
Ավելի վաղ Ռուսաստանի նախագահի մամուլի խոսնակ Դմիտրի Պեսկովը հայտնել էր, որ Կրեմլը Մոսկվայի եւ Կիեւի միջեւ խաղաղ բանակցություններում դրական դինամիկա չի նկատում։ Նա ընդգծել էր ուկրաինական կողմի ոչ հետեւողական գործելաոճը։