Ամեն տարի հունիսի 5-ն ամբողջ աշխարհում նշվում է որպես շրջակա միջավայրի օր: Օրվա՝ 2022-ի կարգախոսն էր` «Միայն մեկ Երկիր մոլորակ»․ տիեզերքի միլիարդավոր գալակտիկաների, դրանցում բազում մոլորակների թվում Երկիր մոլորակն իսկապես միակն է:
Կլիմայի փոփոխությունը, բնական էկոհամակարգերի ու կենսաբազմազանության կորուստը, միջավայրի աղտոտվածությունն ու թափոնները վկայում են, որ մենք վաղուց հատել ենք Երկրում բարեկեցության պահպանման «կարմիր գիծը»:
Շրջակա միջավայրի համաշխարհային օրն ընդամենը առիթ է հիշելու, որ պետք է հոգ տանել մեր մոլորակի մասին:
Օրվա խորհրդին համահունչ՝ տարաբնույթ միջոցառումներ են կազմակերպվել նաեւ Հայաստանում: Երեւանի բուսաբանական այգում կազմակերպվել էր միջոցառում «Ներկենք Երեւանի բուսաբանական այգին» խորագրով՝ հանրության ուշադրությունը այգու խնդիրների վրա սեւեռելու եւ բոլոր մտահոգ անձանց այգու պահպանության գործում ներգրավելու նպատակով։
Առավոտից բուսաբանական այգում էին կրթական հաստատությունների, մասնավոր ընկերությունների ներկայացուցիչներ։ Նրանք կամավորական հիմունքներով ներգրավվել էին այգու բարեկարգման գործին: Շատերն ընտանիքներով էին եկել աջակցելու այգին առավել բարեկարգ ու խնամված դարձնելու գործին:
Կամավորները Հնէաբուսաբանության թանգարանի շենքի մակերեսը համատեղ ուժերով հղկեցին ու ներկեցին։ Ներկվեց նաեւ Երեւանի բուսաբանական այգու տարածքի գազատար խողովակը, այգին մաքրվեց աղբից։