Հարավային Կովկասում Եվրամիության հատուկ ներկայացուցիչ Տոյվո Կլաարը «Ազատության» հետ զրույցում հայտարարել է, որ առանց Ղարաբաղի հայերի կարծիքը հաշվի առնելու հնարավոր չէ հասնել կարգավորման։ Կլաարն այսպես է պատասխանել հարցին, թե արդյոք Լեռնային Ղարաբաղում ապրող հայերի մասնակցությունն է նկատի ունեցել Եվրոպական խորհրդի նախագահ Շաrլ Միշելը, երբ բրյուսելյան եռակողմ հանդիպումից հետո հայտարարեց, թե տեւական եւ արդար խաղաղության համար պետք է քննարկում լինի հիմնական բոլոր հարցերի շուրջ՝ շահագրգիռ բոլոր կողմերի մասնակցությամբ։
«Կարծում եմ, ի վերջո Ղարաբաղի հայերը, իհարկե, մի կողմ են, որոնք պետք է լինեն լուծման մաս, ինչ ձեւով էլ դա տեղի ունենա… Եվ շատ պարզ է, որ Ղարաբաղում ապրող մարդիկ հիմնարար շահագրգռվածություն ունեն համապարփակ կարգավորման հասնելու հարցում: Եվ անձամբ ես չեմ տեսնում, թե ինչպես կարող ենք հասնել նման կարգավորման՝ առանց այդ մարդկանց կարծիքն ու տեսակետը հաշվի առնելու»,- նշել է Կլաարը։
Շառլ Միշելը Նիկոլ Փաշինյանի եւ Իլհամ Ալիեւի հետ հանդիպումից հետո խոսել է միայն Ղարաբաղի էթնիկ հայերի իրավունքների մասին՝ որեւէ բան չնշելով ապագա կարգավիճակի վերաբերյալ: Հարցադրմանն ի պատասխան Տոյվո Կլաարն ընդգծել է․ «Կարծում եմ, ի վերջո հարցն այն է, որ սա պետք է լինի համապարփակ կարգավորում։ Մենք բոլորս գիտենք, թե ինչպես սկսվեց հակամարտությունը, եւ այն պետք է վերջնականապես փակվի։ Նախագահ Միշելն իր հայտարարության մեջ շատ բան չի նշել։ Սա հայտարարություն չէր, որն ընդգրկում էր բոլոր այն խնդիրները, որոնք պետք է լուծվեն: Բայց փաստն այն է, որ մենք միշտ ընդգծել ենք, որ հակամարտության համապարփակ կարգավորումն անհրաժեշտ է, եւ մենք հենց դրա ուղղությամբ ենք աշխատում»։
Լեռնային Ղարաբաղի անորոշ կարգավիճակի վերաբերյալ Տոյվո Կլաարն ասել է, որ հիմա ամենակարեւորն է փորձել առաջ մղել գործընթացը։
«Եվրամիությունը չի պնդում, թե ունի որեւէ բանի հեղինակային իրավունք: Մենք շահագրգռված ենք առաջընթաց տեսնելու եւ դրան աջակցելու մեջ, եւ դա, կարծում եմ, այն է, ինչին նախագահ Միշելը կարողացավ հասնել առաջնորդների հետ իր երեք հանդիպումների, ինչպես նաեւ նախագահներ Մակրոնի, Ալիեւի եւ վարչապետ Փաշինյանի հետ իր հանդիպման միջոցով։ Եվ դա այն է, ինչ մենք ուզում ենք անել»,- ասել է դիվանագետը։
Կլաարը հիշեցրել է, որ կան նաեւ այլ ձեւաչափեր, մասնավորապես մոսկովյան եռակողմ հանդիպումները առաջնորդների մակարդակով: Ապաշրջափակման հարցով նիստերը վերսկսել է փոխվարչապետների հանձնաժողովը։
«Դա հոյակապ է, շատ լավ է, եթե այն մեզ առաջ տանի ճիշտ ուղղությամբ: Այսպիսով՝ Եվրամիության միակ ու միակ շահն է օգնել գործընթացին, օգնել հասնելու կայուն եւ համապարփակ կարգավորման»,- ընդգծել է Եվրամիության հատուկ ներկայացուցիչը: