ԱՄՆ-ի նախագահ Ջո Բայդենը վարչակազմին հանձնարարել է ուսումնասիրել Չինաստանից ներմուծման բարձր մաքսատուրքերի վերացման հնարավորությունը՝ փորձելով զսպել ռեկորդներ սահմանող գնաճը։
ԱՄՆ առեւտրի նախարար Ջինա Ռայմոնդոն CNN հեռուստաալիքին տված հարցազրույցում հայտնել է, որ Դոնալդ Թրամփի նախագահության ժամանակ ընդունված պողպատի եւ ալյումինի ներմուծման սակագները հավանաբար կպահպանվեն, սակայն սպառողական ապրանքների ներմուծման մաքսատուրքերի վերացումը կարող է օգտակար լինել ամերիկյան տնտեսության համար։
Ռայմոնդին նշել է, թե Բայդենը թիմին խնդրել է վերլուծել իրավիճակը, որից հետո վերջնական որոշում կընդունվի:
Նա ընդգծել է, որ, օրինակ, պողպատի եւ ալյումինի դեպքում որոշել են պահպանել որոշ սակագներ՝ աշխատողներին, պողպատի արդյունաբերությունը պաշտպանելու նպատակով, քանի որ դա ազգային անվտանգության հարց է։
Բայց որոշ ապրանքների, օրինակ, կենցաղային իրերի, հեծանիվների եւ այլնի դեպքում մաքսատուրքերի նվազեցումն իմաստ ունի, եւ Բայդենը մտածում է դրա մասին:
Ռայմոնդոն շեշտել է, որ Բայդենի մտահոգությունը գնաճը զսպելն է։ Նա ընդգծել է, որ նախագահը բաց է ցանկացած լավ գաղափարի իրականացման համար, որը կօգնի ամերիկյան ընտանիքներին։