ՀՀ Ազգային ժողովը երկրորդ ընթերցմամբ եւ ամբողջությամբ 58 կողմ ձայնով ընդունել է «Ձերբակալված եւ կալանավորված անձանց պահելու մասին» օրենքում փոփոխություններ կատարելու մասին օրենքի նախագիծը, որով նախատեսվում է բացառել անչափահասների, ինչպես նաեւ կերակրող մայրերի նկատմամբ պատժախուցը որպես տույժի միջոց կիրառելու հնարավորությունը:
Նախագծով առաջարկվում է վերոնշյալ օրենքում հստակեցնել կալանավորված անձանց հոգեբանական եւ հոգեթերապեւտիկ աջակցություն ստանալու իրավունքը: Վերացվում է նաեւ ինքնավնասման համար կարգապահական տույժ կիրառելու իրավական հնարավորությունը:
Օրինագծով սահմանվում է, որ ստացիոնար պայմաններում բուժում ստացող կալանավորված անձանց նկատմամբ նշանակված պատժախուց տեղափոխելու տույժի կիրառումը հետաձգվում է մինչեւ բուժման ավարտը: Իսկ ամբուլատոր պայմաններում բուժում ստացող կալանավորված անձանց նկատմամբ նշանակված պատժախուց տեղափոխելու կիրառումը կարող է հետաձգել բժշկական եզրակացության հիման վրա: Դա կախված է նրանից՝ կալանավորված անձի առողջական վիճակը թո՞ւյլ է տալիս նրան տեղափոխել պատժախուց, թե՞ ոչ:
Առաջին ընթերցմամբ քննարկման համար ներկայացվել էր նախագծերի փաթեթ, առաջինից երկրորդ ընթերցմամբ քննարկման ընթացքում փաթեթից հանվել է քրեակատարողական օրենսգրքում փոփոխություններ եւ լրացումներ կատարելու մասին նախագիծը: Թողնվել է միայն «Ձերբակալված եւ կալանավորված անձանց պահելու մասին» օրենքում փոփոխություններ կատարելու մասին օրենքի նախագիծը: