Իրանի իսլամական հանրապետության անվտանգության գերագույն խորհրդի քարտուղար Ալի Շամխանին հայտարարել է, որ Իրանն անընդունելի է համարում տարածաշրջանում աշխարհաքաղաքական իրավիճակի փոփոխության որեւէ փորձ։
Այսօր Երեւանում վարչապետ Նիկոլ Փաշինյանի հետ հանդիպմանը Շամխանին շեշտել է, որ Իրանը սատարում է ենթակառուցվածքների ապաշրջափակման գործընթացին պետությունների տարածքային ամբողջականության եւ ինքնիշխանության պահպանման շրջանակում:
Փաշինյանն ու Շամխանին քննարկել են տարածաշրջանային կայունության եւ անվտանգության ապահովման, ինչպես նաեւ տարբեր ուղղություններով հայ-իրանական համագործակցության զարգացմանն առնչվող հարցեր:
Ալի Շամխանին Հայաստանի անվտանգության խորհրդի քարտուղար Արմեն Գրիգորյանի հետ այսօր ավելի վաղ ունեցած հանդիպման ժամանակ շեշտել է, որ պետք է հարգվեն պետությունների տարածքային ամբողջականության եւ սահմանների անձեռնմխելիության սկզբունքները:
Իրանի ԱԽ քարտուղարն ընդգծել է Հարավային Կովկասի անվտանգության պահպանմանը նպաստելու՝ Թեհրանի պաստրաստակամությունը։
Կողմերը պայմանավորվել են հանդիպել Հայաստան-Իրան սահմանին երկխոսությունը շարունակելու նպատակով եւ պատրաստակամություն են հայտնել շարունակելու համագործակցությունը Մեղրու ազատ տնտեսական գոտու եւ Հյուսիս-հարավ ճանապարհային միջանցքի շրջանակում:
Հայ-իրանական տնտեսական հարաբերությունների եւ հատկապես Սյունիքի զարգացման համատեքստում առանձնակի շեշտվել է Իրանի Չաբահար նավահանգստի կարեւորությունը: