Հայաստանի ծանրամարտի տղամարդկանց թիմի ներկայացուցիչները սկսել են պայքարն աշխարհի առաջնությունում: Կոլումբիայի մայրաքաղաք Բոգոտայում ընթացող աշխարհի առաջնությունում 89 կգ քաշային կարգում Հայաստանի ներկայացուցիչ Անդրանիկ Կարապետյանը հրել է 166 կգ եւ պոկել 186 կգ: Երկամարտի 352 կգ արդյունքում ընդհանուր հաշվարկում Կարապետյանը գրավել է 12-րդ տեղը: Նույն քաշային կարգում Հայաստանի երկրորդ մասնակից Վարդան Մանուկյանը հանդես է եկել B ենթախմբում եւ երկամարտի 345 կգ արդյունքով 16-րդն է:
Ավելի վաղ Բոգոտայում ընթացող աշխարհի առաջնության կանանց պայքարում Իզաբելա Յայլյանը (59 կգ) B ենթախմբում հրել էր 90 եւ պոկել 115 կգ: Երկամարտի 205 կգ արդյունքով Յայլյանը երկու ենթախմբերում գրավել է 18-րդ տեղը:
Դեկտեմբերի 13-ին մրցահարթակը կտրամադրվի 96 կգ քաշային ծանրորդներին: Հայաստանի մարզական պատիվը կպաշտպանեն Հակոբ Մկրտչյանը եւ Դավիթ Հովհաննիսյանը: Դեկտեմբերի 14-ին աղջիկների մրցավեճում պայքարի դուրս կգան 76 կգ քաշայիններ Տաթեւ Հակոբյանը եւ Միլենա Խաչատրյանը, իսկ տղամարդկանց պայքարում՝ Սամվել Գասպարյանը (102 կգ): Լիանա Գյուրջյանը (81 կգ) եւ Հռիփսիմե Խուրշուդյանը (87 կգ) մրցահարթակ դուրս կգան դեկտեմբերի 15-ին: