Կրեմլի մամուլի ծառայությունից հայտնել են, որ ՌԴ նախագահ Վլադիմիր Պուտինն ու ՀՀ վարչապետ Նիկոլ Փաշինյանը զրուցել են հեռախոսով։
«Որպես շարունակություն Եվրասիական տնտեսական բարձրագույն խորհրդի նիստի շրջանակում Վլադիմիր Պուտինի եւ Նիկոլ Փաշինյանի առանձնազրույցի` քննարկվել են Ռուսաստանի, Հայաստանի եւ Ադրբեջանի ղեկավարների պայմանավորվածությունների իրագործման հարցերը: Հատուկ ուշադրություն է դարձվել հայ-ադրբեջանական սահմանի անվտանգության ապահովմանը, ինչպես նաեւ Անդրկովկասում տրանսպորտային-լոգիստիկ եւ առեւտրատնտեսական կապերի վերականգնման նախագծերին»,– ասված է հաղորդագրությունում:
ՀՀ Կառավարությունից էլ հայտնել են, որ վարչապետն ու ՌԴ նախագահը քննարկել են Լաչինի միջանցքում ստեղծված իրավիճակը։
«Զրուցակիցները քննարկել են Լաչինի միջանցքում ստեղծված իրավիճակի հանգուցալուծմանը վերաբերող հարցեր։ Փաշինյանը կարեւորել է Հայաստանի եւ Լեռնային Ղարաբաղի անխափան կապի ապահովումն ու այդ ուղղությամբ ռուսական խաղաղապահ առաքելության հետեւողական քայլերի իրականացումը»,– ասված է հաղորդագրությունում: