2022-ի փետրվարից՝ գազաբալոնների պարտադիր վկայագրման պահանջի ուժի մեջ մտնելուց հետո հայտնաբերվել ու խոտանվել է մոտ 5000 գազաբալոն՝ կանխելով դրանց հնարավոր պայթյունը: Ամբողջ հանրապետությունում գործում է 69 գազալցակայան, որ օրական մինչեւ 40 ստուգաչափում կարող է անել: Դեռեւս հստակ չէ, թե Հայաստանում քանի տրանսպորտային միջոց է վերասարքավորվել գազաբալոնային համակարգով:
ՀՀ տարածքային կառավարման եւ ենթակառուցվածքների փոխնախարար Արմեն Սիմոնյանը հայտնել է, որ գազաբալոնների մոտ 4600-ը եղել են ժամկետանց, որոնք նույնպես ենթակա են խոտանման, մոտ 400-ը վկայագրման ժամանակահատվածում կա՛մ դեֆորմացվել են, կա՛մ ճղվել: Այս տարի գազաբալոնի պայթյունի դեպք չի գրանցվել։ Պարտադիր պահանջին առայժմ 146 հազար տրանսպորտային միջոց է հետեւել:
Ըստ Սիմոնյանի՝ քանի որ կան տրանսպորտային միջոցներ, որոնց վրա կան մեկից ավելի բալոններ, բալոնների թիվը շատ ավելի մեծ է, մոտ 155 հազար: Տարբեր ուսումասիրություններով՝ գազաբալոնների թիվը 400-450 հազար է: