Ռուսական ՀՕՊ համալիրներն օգոստոսի 16-ին՝ Մոսկվայի ժամանակով 05: 00-ի սահմաններում, Կալուգայի մարզում երեք ուկրաինական անօդաչու թռչող սարք են ոչնչացրել: ՌԴ ՊՆ-ից հավելել են, որ ավերածություններ եւ տուժածներ չկան։
Գերատեսչությունում հիշեցրել են, որ անցյալ շաբաթ ՀՕՊ միջոցները Կալուգայի մարզում եւ Կենտրոնական օղակաձեւ ավտոմոբիլային ճանապարհի շրջանում խոցել էին երկու անօդաչու թռչող սարք, որոնք թռչում էին դեպի Մոսկվա: Զոհեր եւ ավերածություններ չեն եղել։ Օգոստոսի 15-ի երեկոյան ՀՕՊ ուժերը կանխել են Բելգորոդի մարզի տարածքում ԱԹՍ-ով ահաբեկչական հարձակման Կիեւի փորձը: Եվս մեկ հարձակում կանխվել էր նախորդ օրը։
Ուկրաինական օդուժի հրամանատարությունից հայտնել են, որ օգոստոսի 16-ին Ուկրաինայի հարավարեւելյան ուղղությամբ մի քանի ալիքներով հարձակումներ են եղել, Օդեսայի եւ Նիկոլաեւի շրջաններում խոցվել է 13 գրոհային անօդաչու թռչող սարք։ Ըստ «Ազատության»՝ Ուկրաինայի տարածաշրջանային ռազմական վարչակազմի ղեկավար Օլեգ Կիպերը հայտնել է, որ Դանուբի նավահանգիստներից մեկին հարվածների հետեւանքով վնասվել են պահեստներ եւ ամբարներ։ Հաջորդած հրդեհները մարվել են, տուժածներ չկան։