Հայաստանի եւ Ադրբեջանի միջեւ 30 տարվա ընթացքում հնարավորություն է ստեղծվել հասնելու խաղաղության, սակայն ԵՄ անդամ երկրների կողմից Երեւանին ցուցաբերվող ցանկացած ռազմական աջակցություն կարող է սպառնալիք լինել Հարավային Կովկասի կայունության տեսանկյունից։ Այս մասին այսօր APA-ի փոխանցմամբ հայտարարել է Ադրբեջանի արտգործնախարար Ջեյհուն Բայրամովը Չեխիայի Հանրապետության խորհրդարանի Պատգամավորների պալատի նախագահ Մարկետա Պեկարովա Ադամովայի հետ հանդիպման ժամանակ։
«30 տարվա մեջ առաջին անգամ Ադրբեջանի եւ Հայաստանի միջեւ խաղաղության իրական պայմաններ են ստեղծվում, եւ ցանկացած պատրվակով ԵՄ-ի եւ որոշ անդամ պետությունների կողմից Հայաստանին ռազմական օգնություն տրամադրելը կամ հովանավորչության միջոցով խաղաղ գործընթացից Հայաստանին դուրս բերելը վնաս կհասցնի Հարավային Կովկասի տարածաշրջանում կայուն խաղաղության հաստատմանը»,-ասել է Ադրբեջանի ԱԳ նախարարը։
Բայրամովի խոսքերով՝ թեեւ Ադրբեջանը ԵՄ-ի եւ նրա անդամ երկրների վստահելի գործընկերն է, սակայն Բաքվի հանդեպ, իր բնութագրմամբ, «երկակի ստանդարտների» կիրառումը եւ «անարդար մոտեցում ցուցաբերելը» նույնպես չի կարող նպաստել «տարածաշրջանում կայուն խաղաղության հաստատմանը»։