«Ղարաբաղի հարցը փակված է »,-ռուսական «Իզվեստիա» թերթին տված հարցազրույցում ասել է Ադրբեջանում Ռուսաստանի դեսպան Միխայիլ Եվդոկիմովը։
Նա հավատացրել է, որ բոլոր այս տարիներին Ռուսաստանը ջանքեր է գործադրել, որպեսզի լուծի Ղարաբաղի հարցը, բայց չստացվեց։
Ըստ դեսպանի, հիմա «Հայաստանն ու Ադրբեջանը առանց միջնորդների քննարկում են խաղաղության պայմանագրի նախագծեր։ Այն, ինչ առաջարկում է ադրբեջանական կողմը, միանգամայն արդարացված է, եւ, ըստ իս, այդ առաջարկների հիման վրա արդեն իսկ կարելի է կնքել խաղաղության պայմանագիր։ Ռուսաստանը պատրաստ է առավելագույն աջակցություն ցուցաբերել պայմանագրին վերաբերող բանակցություններում, եթե պետք է՝ փորձագետներ կտանք, պայմանագրի տեքստի համար խորհուրդներ կտանք»։
Անդրադառնալով Ղարաբաղում ռուսական զինուժի առկայությանը, Եվդոկիմովն ասել է, որ Ռուսաստանն Ադրբեջանի հետ համաձայնեցնում են բանակցությունների հաջորդ փուլի սկսման ժամկետը։
«Հիմա մենք Ադրբեջանի ԱԳՆ-ի հետ այդ ժամկետները համաձայնեցնելու փուլում ենք»,-ասել է դեսպանը հիշելով, որ իրենց «առաքելությունը» Ղարաբաղում ավարտվում է 2025-ին։