«Ստեփանակերտի հերոսների պանթեոնը ոչնչացված է (լուսանկար)» վերտառությամբ գրառում է հրապարակել Գագիկ Համբարյանը իր ֆեյսբուքյան էջում։ Որոշ լրատվամիջոցներ էլ գրառումը վերահրապարակել են՝ որպես աղբյուր նշելով հեղինակին։
Ալիք Մեդիան ստուգեց գրառման ճշտությունը։ Ներքեւի լուսանկարներում կարող եք տեսնել Ստեփանակերտի Եղբայրական գերեզմանոցի արբանյակային լուսանկարները 2021 թվականի նոյեմբերի 8-ի եւ 2024-ի ապրիլի 5-ի դրությամբ։ Արբանյակային լուսանկարներում երեւում է, որ այս տարվա ապրիլի 5-ի դրությամբ գերեզմանոցն իր հուշարձաններով դեռեւս պահպանված է։
2024-ի ապրիլի 5-ի արբանյակային լուսանկարի աջ մասում երեւում են բացված գերեզմանափոսեր, որոնք փորվել են 2023 -ի սեպտեմբերի 19-ի մարտական գործողությունների ժամանակ զոհվածների համար։ Դրանում կարող ենք համոզվել նաեւ 2023-ի սեպտեմբերի 25-ին սիվիլնեթի հրապարակած լուսանկարը դիտելով։
Այսպիսով՝ պնդումը թե Ստեփանակերտի Եղբայրական գերազմանոցը ոչնչացված կամ քանդված է, չի համապատասխանում իրականությանը։