Վրաստանի Ներքին գործերի նախարարության արտակարգ իրավիճակների դեպարտամենտից եւ ՌԴ արտակարգ իրավիճակների նախարարության Հյուսիսային Օսիայի ճգնաժամային կառավարման կենտրոնից ստացված տեղեկատվության համաձայն՝ Ստեփանծմինդա-Լարս ավտոճանապարհը փակ է բոլոր տեսակի տրանսպորտային միջոցների համար։ Այս մասին հայտնում է ՀՀ ՆԳՆ-ն։
Վրաստանի ՆԳՆ-ի տվյալներով՝ ժամը 08:36-ին Արտակարգ իրավիճակների կառավարման ծառայությունն ահազանգ է ստացել Դեւդորակի կիրճում տեղադրված չափիչ դետեկտորից Թերեք գետի մակարդակի կտրուկ բարձրացման վերաբերյալ։
Գերատեսչությունը հայտնում է, որ սահմանային անցակետից տարհանվել են պարեկային ոստիկանությունը, մաքսային ծառայությունը, սահմանապահ ոստիկանությունը եւ անցակետում աշխատող մասնավոր ընկերությունների բոլոր աշխատակիցները։ Միաժամանակ փակ է Գվելեթի գյուղի մերձակա ճանապարհը։
ՌԴ ԱԻՆ-ն էլ հայտնում է Վրաստանի տարածքում տեղի ունեցած ձնահյուսի մասին։
«Վրաստանի տարածքում տեղի ունեցած ձնահյուսի պատճառով տրանսպորտային միջոցների անվտանգ երթեւեկությունն ապահովելու անհնարինությունը, ինչպես նաեւ Վրաստանի սահմանապահ ոստիկանության առաջարկությունները հաշվի առնելով՝ արգելվում է բոլոր տեսակի մեքենաների տեղաշարժը Ռուսաստանից Դաշնությունից դուրս տանող Վլադիկավկազ-Լարս հատվածում»,-ասվում է հաղորդագրության մեջ եւ հավելվում, որ տրանսպորտային միջոցների տեղաշարժի արգելքը կգործի մինչեւ նոր ծանուցում։