ԱՄՆ-ին նախապես չի ծանուցվել Կուրսկի շրջանում Ուկրաինայի զինված ուժերի հարձակողական գործողությունների մասին, ճեպազրույցի ժամանակ ասել է Պետդեպարտամենտի խոսնակ Մեթյու Միլլերը՝ հավելելով, որ դա արտառոց բան չէ։
«Մենք Ուկրաինային տրամադրում ենք միջոցներ եւ խորհրդատվություն։ Բայց երբ խոսքը վերաբերում է ամենօրյա մարտավարությանը, ամենօրյա հարվածներին, երբեմն կապ ենք հաստատում նրանց հետ, երբեմն էլ ոչ»,-ասել է Միլլերը։
Նրա խոսքով, այն պայմաններում, երբ Ռուսաստանը խախտում է Ուկրաինայի ինքնիշխանությունն ու տարածքային ամբողջականությունը, Կիեւն ինքն է որոշումներ կայացնում, թե ինչպես է վարելու իր ռազմական գործողությունները։
Պետդեպարտամենտի խոսնակը նաեւ ընդգծել է, որ ռուսական տարածքի վրա ամերիկյան զենքի կիրառման սահմանափակումների քաղաքականության մեջ որեւէ բան դեռ չի փոխվել։
Միեւնույն ժամանակ, Միլլերը նշել է, որ Միացյալ Նահանգները «շփման մեջ է» ուկրաինացիների հետ «սահմանային այս գործողության հետ կապված»։