Ադրբեջանում այսօր մեկնարկում է COP29-ը՝ Կլիմայի փոփոխության ՄԱԿ-ի շրջանակային համաժողովը։
Համաժողովը Բաքվում անցկացնելու որոշումը կայացվել է 2023 թվականի դեկտեմբերին Հայաստանի աջակցությամբ։ Այս մասը ամրագրված է Հայաստանի վարչապետի եւ Ադրբեջանի նախագահի աշխատակազմերի համատեղ հայտարարության տեքստում, որը վարչապետի աշխատակազմը հրապարակել էր դեկտեմբերի 7-ին։
«Որպես բարի կամքի քայլ` Հայաստանի իր աջակցությունն է հայտնում ՄԱԿ-ի Կլիմայի փոփոխության մասին շրջանակային կոնվենցիայի Մասնակիցների կոնֆերանսի 29-րդ նստաշրջանը (COP29) հյուրընկալելու նպատակով Ադրբեջանի ներկայացրած հայտին եւ հանում է իր թեկնածությունը: […] Որպես բարի կամքի քայլ` Ադրբեջանն իր աջակցությունն է հայտնում Արեւելյան Եվրոպայի խմբի COP-ի բյուրոյին անդամակցելու համար առաջադրված` Հայաստանի թեկնածությանը»,- ասվում էր համատեղ հայտարարության տեքստում:
Ընդգծենք, որ նաեւ հենց այս հայտարարության հիման վրա Բաքուն հայկական կողմին վերադարձրեց 32 հայ ռազմագերու, իսկ Երեւանը՝ 2 ադրբեջանցի զինծառայողի։
Ակնկալվում է, որ մինչեւ նոյեմբերի 24-ը շարունակվող համաժողովին կմասնակցեն ավելի քան 100 երկրների ղեկավարներ և ներկայացուցիչներ։ Նախնական հայտարարությունների համաձայն՝ մասնակցողների թվում են լինելու նաեւ Հայաստանի սահմանակից երեք երկրների ղեկավարները՝ Իրանի նախագահ Մասուդ Փեզեշքիանը, Վրաստանի վարչապետ Իրակլի Կոբախիձեն եւ Թուրքիայի նախագահ Ռեջեփ Թայիփ Էրդողանը։
Ադրբեջանը COP29-ին մասնակցելու հրավեր ուղարկել է նաեւ Հայաստանին։ Սակայն հոկտեմբերի 31-ին ՀՀ ԱԺ-ում բյուջեի քննարկման շրջանակում արտգործնախարար Արարատ Միրզոյանը հայտարարեց, որ «գագաթնաժողովին Երեւանի մասնակցությունը հաստատված չէ»։
Նոյեմբերի 11-ին Ազգային ժողովի նախագահ Ալեն Սիմոնյանն էլ հայտարարեց, որ հայ գերիներին վերադարձնելու հավանականության դեպքում Հայաստանը կարող է մասնակցել COP29-ի գագաթնաժողովին։