Հունգարիայի վարչապետ Վիկտոր Օրբանը հայտարարել է, որ Ուկրաինայի նախագահ Վլադիմիր Զելենսկուն հրադադարի առաջարկ է արել՝ կապված Սուրբ Ծննդյան տոների հետ, սակայն նա հրաժարվել է։
«ԵՄ-ում Հունգարիայի նախագահության ավարտին մենք նոր ջանքեր գործադրեցինք խաղաղության հասնելու համար: Մենք առաջարկել ենք սուրբծննդյան զինադադար եւ գերիների լայնածավալ փոխանակում։ Ցավալի է, որ նախագահ Զելենսկին այսօր հստակորեն մերժել եւ բացառել է դա։ Մենք արեցինք այն ամենը, ինչ կարող էինք»,- գրել է Օրբանը X-ի եւ Ֆեյսբուքի էջերում։
Հունգարիայի վարչապետը X-ի էջում գրառմանը նա նաեւ կցել է Ուկրաինայի նախագահ Զելենսկու այն գրառումը որտեղ նա քննադատել է Օրբանի եւ Ռուսաստանի նախագահ Վլադիմիր Պուտինի հերթական հեռախոսազրույցները։
«Մենք հուսով ենք, որ Վիկտոր Օրբանը գոնե [Սիրիայի նախկին նախագահ Բաշար] Ասադին չի զանգի Մոսկվա՝ նաեւ նրա մեկժամանոց դասախոսությունները լսելու համար»,- գրել էր Զելենսկին։
Զելենսկու հաղորդակցության հարցերով խորհրդական Դմիտրի Լիտվինը հայտարարել է, որ Հունգարիան «ինչպես միշտ, Ուկրաինայի հետ ոչինչ չի քննարկել»։
«Ինչպես միշտ, Հունգարիան մեզ չի տեղեկացրել Մոսկվայի հետ իր շփումների մասին։ Ինչպես միշտ, Ուկրաինան ոչ մի կերպ չի լիազորել Հունգարիային իրեն ներկայացնել»,- գրել է Լիտվինը X-ի էջում՝ հավելելով, որ Կիեւն ամենօրյա աշխատանք է տանում գերեվարված զինվորականներին ազատելու համար եւ ձգտում է հասնելու իրական ու կայուն խաղաղության։
2024 թվականի հուլիսին Վիկտոր Օրբանը հայտարարեց խաղաղապահ առաքելության մասին եւ դրա շրջանակում այցելեց Կիեւ եւ Մոսկվա։ Օրբանն այցելել էր նաեւ Պեկին, որտեղ հանդիպել էր Չինաստանի ղեկավար Սի Ծինփինի հետ, ապա ուղեւորվել ԱՄՆ, որտեղ էլ Ֆլորիդայում հանդիպում էր ունեցել այդ ժամանակ դեռ նախագահի թեկնածու Դոնալդ Թրամփի հետ։
ԵՄ իշխանությունները քննադատել են Օրբանին Պուտինի հետ հանդիպման համար՝ ասելով, որ Հունգարիայի վարչապետը չի ներկայացնում ԵՄ շահերը։ Վիկտոր Օրբանի՝ որպես խաղաղարար հանդես գալու փորձերը մերժել է նաեւ Վլադիմիր Զելենսկին։
2023 թվականի հունվարին Պուտինը 36-ժամյա հրադադար հայտարարեց Ուկրաինայում, որը, ըստ նրա, պետք է մարդկանց թույլ տար մասնակցել եկեղեցական արարողություններին: Սուրբ Ծննդի օրը հրադադարի կոչ արեց նաեւ Ռուս ուղղափառ եկեղեցու առաջնորդ պատրիարք Կիրիլը։ Ուկրաինայի նախագահի գրասենյակը Պուտինի այդ նախաձեռնությունն անվանել էր կեղծավորություն։