ԱՄՆ նորընտիր նախագահ Դոնալդ Թրամփը Չինաստանի առաջնորդ Սի Ծինփինին հրավիրել է իր երդմնակալության արարողությանը, որը կկայանա հունվարի 20-ին։ Այդ մասին հայտնում է CBS News-ը՝ հղում կատարելով իրազեկ աղբյուրներին։
Գործակալության զրուցակիցների խոսքերով՝ Թրամփը Չինաստանի առաջնորդին հրավերն ուղարկել է դեռ նոյեմբերի սկզբին՝ ԱՄՆ նախագահական ընտրություններում իր հաղթանակից անմիջապես հետո։ Միեւնույն ժամանակ պարզ չէ, թե արդյոք Սի Ծինփինն ընդունել է հրավերը։ Վաշինգտոնում Չինաստանի դեսպանատունը չի պատասխանել մեկնաբանության խնդրանքին։
CBS News-ը նշում է, որ Դոնալդ Թրամփի թիմը քննարկում է երդմնակալության արարողությանը աշխարհի այլ առաջնորդներին հրավիրելու հնարավորությունը։
Հունգարիայի վարչապետ Վիկտոր Օրբանը, որը դեկտեմբերի 9-ին հանդիպել է Թրամփի հետ Ֆլորիդայի Մար-ա-Լագոյի առանձնատանը, «դիտարկում» է մասնակցության հավանականությունը, ասել է աղբյուրներից մեկը։
«Համաշխարհային առաջնորդները հերթ են կանգնել նախագահ Թրամփի հետ հանդիպելու համար, քանի որ գիտեն, որ նա շուտով կվերադառնա իշխանության եւ կվերականգնի համաշխարհային խաղաղությունը ամերիկյան ուժով»,- հայտարարել է Քերոլայն Լեւիթը, որին Թրամփը ընտրել է որպես Սպիտակ տան մամուլի քարտուղար:
Դոնալդ Թրամփի պաշտոնավարման առաջին ժամկետում ԱՄՆ-Չինաստան հարաբերությունները որոշակի լարվածություն ունեցան՝ պայմանավորված, այսպես կոչված, առեւտրային պատերազմներով։ Այս տարի ընտրվելուց հետո Թրամփը արդեն հայտարարել է, որ պատրաստ է 10 տոկոս մաքսատուրքեր սահմանելու չինական բոլոր ապրանքների վրա։ Չինացի պաշտոնյաները, մեկնաբանելով Թրամփի սպառնալիքները, նշել են, որ ո՛չ ԱՄՆ-ը, ո՛չ Չինաստանը չեն շահի առեւտրային պատերազմից։ Սպառնալիքների ֆոնին Պեկինն արգելել է երկակի նշանակության մի շարք ապրանքների արտահանումը ԱՄՆ։