Միացյալ Նահանգները մտահոգված է Ադրբեջանում իրավապաշտպանների, քաղաքացիական հասարակության եւ ԶԼՄ-ների դեմ աճող ճնշումներով եւ Բաքվին կոչ է անում ազատ աձակել նման գործունեության համար բոլոր ձերբակալվածներին։ Այդ մասին ասվում է ԱՄՆ Պետքարտուղարության տարածած հաղորդագրության մեջ։
Ձերբակալվածներից Ռուֆաթ Սաֆարովը, որը, ըստ Պետքարտուղարության, Ադրբեջանում մնացած քիչ իրավապաշտպաններից էր, թիրախավորվել էր իր գործունեության համար։
Պետքարտուղարությունը հիշեցնում է, որ Սաֆարովի հիմնադրած «Defense Line» քաղաքացիական հասարակության կազմակերպությունը զբաղվում է Ադրբեջանում կոռուպցիայի, քաղաքական պատճառներով ձերբակալությունների, հետապնդումների եւ խոշտանգումների փաստաթղթավորմամբ։
«Ադրբեջանի իշխանությունները Սաֆարովին կալանավորել են դեկտեմբերի 3-ին, ընդամենը օրեր առաջ, երբ նա պետք է մեկներ Միացյալ Նահանգներ՝ ստանալու պետքարտուղարի Մարդու իրավունքների պաշտպանի մրցանակը»,- ասվում է հաղորդագրության մեջ։
Մյուս օրինակը, որ ներկայացվում է Պետքարտուղարության հայտարարության մեջ, Abzas Media-ի գլխավոր խմբագիր Սեւինջ Վագիֆգիզիի գործունեությունն է։ Նշվում է, որ նրա ղեկավարած լրատվականի թիմը հրապարակել է Ադրբեջանի պետական պաշտոնյաների վերահսկած ընկերությունների համար անցկացրած անօրինական մրցույթների մասին տեղեկությունները եւ հետաքննել պետական միջոցների մեծածավալ յուրացման դեպքերը:
«Նրա աշխատանքը հարուցել է իշխանությունների զայրույթը, եւ նա նախնական կալանքի տակ է 2023 թվականի նոյեմբերից»,- ասվում է հաղորդագրության մեջ:
Նշվում է նաեւ, որ դեկտեմբերի 9-ին Վագիֆգիզին հեռակա կարգով ստացել է Պետքարտուղարի 2024 թվականի «Anti-Corruption Champions» մրցանակը։
«Մենք կոչ ենք անում Ադրբեջանի կառավարությանը ազատ արձակել մարդու իրավունքների պաշտպանության համար անարդարացիորեն կալանավորվածներին, դադարեցնել քաղաքացիական հասարակության դեմ բռնաճնշումները, հարգել բոլորի մարդու իրավունքներն ու հիմնարար ազատությունները եւ կատարել այն պարտավորությունները, որոնք ստանձնել է Եվրոպայի անվտանգության եւ համագործակցության կազմակերպությանն անդամակցելիս»,- ասվում է պետքարտուղարության հաղորդագրության եզրափակիչ հատվածում:
ԱՄՆ Պետքարտուղարության այս հայտարարությանը այսօր պատասխանել է Ադրբեջանի արտգործնախարարության խոսնակ Այխան Հաջիզադեն՝ այն որակելով որպես «միջամտություն Ադրբեջանի դատական եւ իրավական գործընթացներին»։
«Ցավոք, Ադրբեջանի ներքին գործերին ԱՄՆ պետքարտուղարության միջամտության պատճառով վերջին 4 տարիները համարում ենք կորած Ադրբեջան-ԱՄՆ հարաբերությունների համար, որոնք հայտնի էին բարեկամությամբ եւ համագործակցությամբ»,- հայտարարել է Հաջիզադեն։
Ադրբեջանի արտգործնախարարության խոսնակը նաեւ հույս է հայտնել, որ «ԱՄՆ նոր վարչակազմի օրոք Ադրբեջանի եւ Միացյալ Նահանգների միջեւ բարեկամական եւ գործընկերային հարաբերությունները կվերականգնվեն»։