Ադրբեջանի ԶՈՒ ստորաբաժանումները ապրիլի 23-ին՝ 22:20-ի սահմաններում, կրակ են բացել Սյունիքի մարզի Խոզնավար բնակավայրի ուղղությամբ, ինչի հետեւանքով բնակելի տուն է վնասվել։ Այդ մասին հաղորդում է ՀՀ պաշտպանության նախարարությունը։
Գերատեսչության հաղորդագրության համաձայն՝ տուժածներ չկան:
«Ադրբեջանական կողմին կոչ ենք անում հետաքննել Խոզնավարի բնակելի տան գնդակոծման փաստը եւ հանդես գալ հրապարակային պարզաբանումներով»,- ասվում է ՀՀ ՊՆ հաղորդագրության տեքստում։
Պաշտպանության նախարարությունը նաեւ հիշեցնում է, որ ՀՀ վարչապետի աշխատակազմն առաջարկել է ստեղծել հրադադարի ռեժիմի խախտման դեպքերի եւ/կամ այդ մասին տեղեկությունների հետաքննության Հայաստան-Ադրբեջան համատեղ մեխանիզմ, ինչին մինչ օրս Բաքուն չի արձագանքել։
Հիշեցնենք, որ մարտի վերջից սկսած՝ Ադրբեջանի պաշտպանության նախարարությունը բազմաթիվ հայտարարություններ է տարածել, որոնցում Հայաստանի զինված ուժերին մեղադրում է իբր սահմանագոտու արեւելյան եւ հարավարեւելյան հատվածներում հրադադարի ռեժիմը խախտելու համար։
Հայաստանի պաշտպանության նախարարությունը հերքել էր այս մեղադրանքները, իսկ ապրիլի 1-ին, 13-ին եւ 21-ին հաղորդել Սյունիքի մարզի Խնածախ բնակավայրի ուղղությամբ արձակված կրակոցների մասին, որոնց հետեւանքով վնասվել էին մեկ բնակելի տուն եւ մշակույթի տունը։
Ապրիլի 22-ին Հայաստանում տեղակայված ԵՄ դիտորդական առաքելության ներկայացուցչությունը հայտարարեց, որ Խոզնավարում կատարված պարեկության ժամանակ նկատել են հարակից ադրբեջանական դիրքերից արձակված կրակոցի հետքերը։