Ռուսաստանի արտաքին գործերի նախարար Սերգեյ Լավրովը CBS հեռուստաալիքին տված հարցազրույցում հայտարարել է, որ Ուկրաինայի հակամարտության կարգավորման վերաբերյալ համաձայնագրի որոշ կետեր կարիք ունեն վերամշակման։
«Ամերիկայի Միացյալ Նահանգների նախագահը համարում է, եւ ես կարծում եմ՝ արդարացիորեն, որ մենք շարժվում ենք ճիշտ ուղղությամբ։ Նախագահի [ԱՄՆ] հայտարարության մեջ խոսվում է համաձայնության մասին, եւ մենք պատրաստ ենք այդ համաձայնագիրը կնքելու, սակայն դեռ կան որոշ առանձին պահեր, տարրեր, որոնք պետք է վերամշակվեն, եւ մենք զբաղված ենք հենց այդ գործընթացով»,- ասել է Լավրովը հարցազրույցի ընթացքում, որի հատվածները հրապարակվել են ապրիլի 24-ին։
ՌԴ ԱԳ նախարարն ավելացրել է, որ իր կարծիքով կողմերը «շարժվում են ճիշտ ուղղությամբ», քանի որ ԱՄՆ նախագահ Դոնալդ Թրամփը «միակ առաջնորդն է, որը ճանաչել է այս իրավիճակի հիմնարար պատճառները վերացնելու անհրաժեշտությունը»։
Լավրովի հարցազրույցի ամբողջական տարբերակը կհեռարձակվի CBS հեռուստաալիքով կիրակի՝ ապրիլի 27-ին։
Մամուլում տարածված տեղեկությունների համաձայն՝ Դոնալդ Թրամփի վարչակազմի մշակած խաղաղության ծրագրում ներառված է Ղրիմը որպես Ռուսաստանի մաս ճանաչելու առաջարկ։ Ուկրաինայի նախագահ Վլադիմիր Զելենսկին հայտարարել է, որ Կիեւը չի ճանաչում Ղրիմի օկուպացիան։ Զելենսկու այս հայտարարությունից հետո ԱՄՆ պետքարտուղար Մարկո Ռուբիոն հրաժարվել էր ապրիլի 23-ին Լոնդոն մեկնելուց, որտեղ նախատեսված էին Ուկրաինայի, ԱՄՆ-ի եւ եվրոպական երկրների պատվիրակությունների բանակցությունները՝ նվիրված ռուս-ուկրաինական հակամարտության ավարտին։ Բանակցություններին մասնակցել են ոչ թե արտաքին գործերի նախարարները, այլ ավելի ցածր կարգի պաշտոնյաներ։
Ապրիլի 23-ին Դոնալդ Թրամփը հայտարարել է, որ իր կարծիքով ԱՄՆ-ը արդեն համաձայնության է հասել Ռուսաստանի հետ, սակայն «պետք է համաձայնության գալ» նաեւ Ուկրաինայի նախագահ Վլադիմիր Զելենսկու հետ։
«Ես կարծում էի՝ Զելենսկու հետ ավելի հեշտ կլինի։ Մինչդեռ պարզվեց՝ դա ավելի բարդ է, բայց դա նորմալ է… Կարծում եմ՝ մենք ունենք համաձայնություն երկուսի հետ էլ»,- ասել է Թրամփը։