ՀՀ առողջապահության նախարարությունից հայտնել են, որ աշխարհում կարմրուկի առումով համաճարակային իրավիճակը լարված է: Աշխարհում կարմրուկի դեպքերը 2022-ին 2021-ի համեմատ աճել են մոտ 80%-ով. միտումը շարունակվում է նաեւ ներկա փուլում: Կարմրուկի դեպքեր գրանցվում են աշխարհի գրեթե բոլոր երկրներում: Համաճարակային իրավիճակն անհանգիստ է նաեւ ԱՀԿ եվրոպական տարածաշրջանում:
Հայաստանում եւս կարմրուկի առումով համաճարակային իրավիճակն անբարենպաստ է։ Մարտի 3-ից մինչեւ հունիսի 6-ը գրանցվել է կարմրուկի լաբորատոր հաստատված 209 դեպք, որոնցից 8-ը վերջին օրերին ճանապարհորդությունից վերադարձած եւ շրջագայության ընթացքում հիվանդացած ՀՀ քաղաքացիներ են։ Կարմրուկի համաճարակային իրավիճակը կարող է սրվել՝ հաշվի առնելով ներկայում զբոսաշրջության ակտիվությունը:
Պատվաստումը կանխարգելման միակ անվտանգ եւ արդյունավետ միջոցն է
Հանգստի մեկնելուց առաջ բոլոր նրանց, ովքեր կարմրուկի դեմ պատվաստված չեն կամ թերի են պատվաստված, ինչպես նաեւ նախկինում չեն հիվանդացել, խորհուրդ է տրվում մեկնելուց առնվազն 10 օր առաջ կարմրուկի դեմ պատվաստվել, որը կանխարգելման միակ անվտանգ եւ արդյունավետ միջոցն է: Հայաստանի բժշկական օգնություն եւ սպասարկում իրականացնող բոլոր կազմակերպություններն ապահովված են կարմրուկի, կարմրախտի, խոզուկի դեմ համակցված պատվաստանյութերով: Յուրաքանչյուր անձ, ով չի ստացել կարմրուկի դեմ նախատեսված պատվաստումները, կարող է դիմել պոլիկլինիկա/ամբուլատորիա եւ պատվաստվել: