Ըստ ամերիկյան CNN լրատվական գործակալության՝ ԱՄՆ Պաշտպանության դեպարտամենտի՝ Պենտագոնի շենքն արգելափակվել եւ շրջափակվել է ոստիկանության կողմից շենքի մոտ՝ ավտոբուսի կայանատեղիում, տեղի ունեցած կրակոցների պատճառով:
Պենտագոնի անվտանգության ծառայությունից հայտնել են, որ միջադեպը տեղի է ունեցել շինությունից դուրս գտնվող «տրանզիտային կենտրոնում», որով ամեն օր մտնում եւ դուրս են գալիս անձնակազմի հազարավոր աշխատակիցներ:
Հրաձգության հետեւանքով ոստիկանության սպա է զոհվել, երկու մարդ ծանր վիրավորվել է: Նշվում է, որ կրակ բացած անձը չեզոքացված է:
Վիրջինիա նահանգում՝ Արլինգթոնում, Պենտագոնին մերձակա տրանսպորտային հանգույցի տարածքում կրակոցների պատճառով իշխանությունները դադարեցրել են Վաշինգտոնի մետրոյի գնացքների երթեւեկը «երկնագույն» ճյուղով, որն անցնում է Պենտագոնի համալիրի մոտով:
Վերջին տվյալներով՝ Պենտագոնի աշխատակիցները միջադեպից հետո վերադառնում են աշխատավայր, սակայն ոստիկանները, հրշեջները եւ բժիշկները շարունակում են տեղում հերթապահել: