Թուրք հայտնի քրեական հեղինակություն Սեդաթ Փեքերը հայտարարել է Հայաստան այցելելու մտադրության մասին:
«Ընկերներ, դուք ասում եք, որ Սեդաթ Փեքերն արել է այն, ինչ ընդդիմությունը չի կարողացել անել 20 տարվա ընթացքում, եւ ես էլ ասում եմ ձեզ՝ իմ ծառայությունը ժողովրդին դեռ չի ավարտվել: Ես մեկնում եմ Սիրիա՝ նպաստելու արտաքին քաղաքականությանը: Այնտեղից մեկնելու եմ Կիպրոս, Հունաստան եւ Հայաստան»,- Twitter- ի իր միկրոբլոգում գրել է Փեքերը՝ իրեն անվանելով «համաշխարհային խաղաղության դեսպան»:
Նախորդ տարվա հունվարին Թուրքիայից փախած Փեքերի անունը քաջ հայտնի է թուրք հասարակությանը: Թուրքական հանցավոր աշխարհում Փեքերը համարվում է գլխավոր հեղինակություններից մեկը։ 49-ամյա Փեքերը բազմիցս դատապարտվել է հանցավոր գործունեության համար։
Համացանցում նրա ժողովրդականությունը բարձրացել է վերջին ամիսներին՝ YouTube-ի մի շարք տեսաուղերձներից հետո: Իր ելույթներում նա լուրջ մեղադրանքներ է ներկայացնում Թուրքիայում իշխող «Արդարություն եւ զարգացում» կուսակցության քաղաքական գործիչների հասցեին:
Փեքերը նշել էր, որ Թուրքիայի իշխող շրջանակների ներկայացուցիչները ներգրավված են սպանությունների, բռնաբարությունների, թմրանյութերի մաքսանենգության, պաշտոնեական դիրքի չարաշահման եւ բազմաթիվ այլ հանցագործությունների մեջ: